MANILA, July 16 (PIA)–Gitahasan ni Presidente Benigno ‘Noynoy’ Aquino III ang Philippine Drug Enforcement Agency (PDEA) nga hingosgan ug tutokan ang kampanya batok sa illegal drug trafficking sa nasud.
Sa pulong nga gipahigayon sa Malakanyang ning bag-o lang nga gitambungan sa mga pangulo sa nagkalain-laing concerned government agencies, hugot nga gi-mando ni PNoy nga angay motutok ang tanang ahensiya sa pagpugong sa pagkatap sa ilegal nga droga sa nasud dungan sa pagsumpo sa smuggling ug manufacturing activities niini.
Gipahayag pa ni PNoy nga angay i-prioritize sa mga law enforcement agencies ang mga komunidad base sa lebel sa hulga sa ilegal nga droga aron masigurong ma-protektahan ang katawhan ilabi na ang mga kabataan.
Matud pa ni Presidential Communications Operations Office (PCOO) Kalihim Herminio Coloma Jr. nga ang mando sa Presidente naka-ankla sa 5 Pillars of Action ubos sa National Drug Program of Action 2015 to 2020 — Drug Supply Reduction; Drug Demand Reduction; Alternative Development; Civic Awareness and Response; ug Regional/International Cooperation.
Gikumpirmar ni PDEA Director General Arturo Cacdac nga sukad tuig 2010 hangtud 2014, nikabat na sa 13,792 indibidwal ang naaresto tungod sa ilegal nga droga.
Kalabot niini, gipahayag usab ni Kalihim Janette Garin sa Department of Health (DOH) nga magpahigayon sila og repair, facilities improvement ug expansion sa mga drug treatment ug rehabilitation centers sa tibuok nasud diin adunay nakagahing pondo nga P393 milyon. (ecb/PIA7-Bohol)