TAGBILARAN CITY, Bohol, Jan. 07 (PIA)–Gitangtang sa Commission on Elections (Comelec) sa listahan sa balota ang 13 ka bag-ong party-list groups nga naapil sa gipahigayong raffle niadtong Enero 4.
Matud pa ni Comelec Chairman Sixto Brillantes, naapil sa listahan ang mga grupo sa raffle alang sa ballot slot human kining makakuha og status quo ante (SQA) order gikan sa Korte Suprema.
Apan human ang panagpulong sa mga Comelec officials ganinang buntag, nagdesisyon ang mga opisyal nga tangtangon ang 13 ka bag-ong aplikante.
Matud pa ni Comelec Commissioner Rene Sarmiento, kasamtangang gitangtang ang mga grupo apan i-apil ra usab sa listahan kun makakakuha sa kini og mandatory injunction sa dili pa mag- Enero 10 diin i-configure ang mga balota.
Gawas sa SQA, kinahanglang may gunitan usab nga manadatory injunction ang mga bag-ong grupo nga dili pa accredited sa dili pa kini tugotan nga makaapil sa eleksiyon, matud pa sa gipagawas nga resolusyon sa poll body.
Ang 13 ka partylist groups nga gitangtang sa listahan sa balota mao ang mosunod: Ako An Bisaya Party (AAB); Alagad ng Sining (ASIN); Alab ng Mamamahayag (ALAM); Association of Guard, Utility Helper, Aider, Rider, Driver/Domestic Helper, Janitor, Agent, and Nanny of the Philippines Inc. (GUARDJAN); Abyan Ilonggo; Alliance or Organizations, Networks and Associations of the Philippines Inc. (ALONA); Partido ng Bayan and Bida (PBB); Pilipinas Para sa Pinoy (PPP); 1 Alliance Advocating Autonomy Party (1AAAP); Kalikasan Partylist (KALIKASAN); Akbay Kalusugan (AKIN); Manila Teachers Savings and Loan Association Inc. (MANILA TEACHERS); ug ang Association of Local Athletics Entrepreneurs and Hobbyists Inc. (ALA-EH). (PIA-Bohol/ecb/I-gg)