Province-wide massive clean-up drive himuon sa kagamhanang probinsiyal ug kalungsuran karong Biyernes sa hapon.
MIKABAT na ngadto sa 1,412 ka mga Bol-anon ang nataptan sa makamatay nga sakit nga dengue ug siyam na ang namatay niini gikan sa bulan sa Enero hangtud sa Septiyembre 13 ning tuiga.
Kini maoy gibutyag ni Provincial Health Officer, Dr. Reymoses Cabagnot ngadto sa Bohol Balita kagahapon.
Matud ni Cabagnot nga siyam sa mga namatay, tulo niini natala sa dakbayan sa Tagbilaran, usa sa lungsod sa Calape, usa sa Baclayon, usa sa Garcia-Hernandez, usa sa Ubay, usa sa Loay ug usa sa lungsod sa San Miguel.
Niingon usab si Cabagnot nga ang Tagbilaran maoy nanguna sa pinakadaghang nataptan sa maong sakit sa napulo ka lugar sa Bohol diin nitala na kini og 400 ka mga kaso, gisundan sa Talibon nga may 59 ka kaso, Dauis ug Carmen nga managsama nga dunay 57 ka kaso, Maribojoc, 55; Calape, 51; Baclayon, 45; Alburquerque, 43; Loon, 42; Cortes, 41; Garcia-Hernandez, 35; Panglao ug Dimiao nga managsama nga dunay 30 ka kaso.
Pasabot ni Cabagnot nga sa mga kalungsuran, mag-utro-utro ang ranking sa mga nataptan gumikan kay dunay mga lungsod nga nianam og saka ang kaso sa mga nataptan.
Nunot niini, ang kagamhanang probinsiyal ubos ni Gobernador Edgar Chatto niisyo og usa ka direktiba ngadto sa tanang local government units (LGU”s) , mga empleyado sa gobyerno, pribado ug mga reliheyosong grupo nga mosalmot sa province-wide nga massive clean-up drive.
Ang maong kalihukan nga gitawag usab og Operation Uga gitakdang pagasugdan mga 1:30 sa hapon karong Biyernes diin ang mga opisyales ug mga empleyado sa kapitolyo ug sa 47 ka kalungsuran ug sa siyudad magdungan og hinlo sa palibot sa tagsa-tagsa ka mga dapit.
Dugang ni Cabagnot nga dunay kemikal nga gitawag og larvicidal nga pangpatay kini sa mga larva ug itlog sa lamok ang ipanghatag sa mga kalungsuran.