TAGBILARAN CITY, Bohol, Feb. 21 (PIA)–IPAHIGAYON sa lungsod sa Trinidad ang ika-15 nga HEAT Bohol Caravan sa umaabot Marso 13, 2013.
Sa coordination meeting nga gipatawag kagahapon sa kagamhanang probinsiyal, nagpasalamat og daku ang first lady sa lungsod sa Trinidad nga si Judith Cajes nga ang ilang lungsod na usab ang usa sa maka benepisyo sa mga serbisyo nga idalit sa HEAT Caravan.
Matud pa ni Cajes, dugay na nila kining gipangandoy apan nagpaulahi lang ang lungsod sa Trinidad tungod kay nag-obserbar pa sila sa ubang lungsod aron kun adto na kini ipahigayon, hipno ug sakto na ang ilang preparasyon.
Ang HEAT kun Health and sanitation o Kasanihan, Edukasyon, Agrikultura ug Turismo, ang nag-unang haligi o programa sa adminstrasyon nilang Gob. Edgar Chatto ug Bise Gob. Concepcion Lim.
Gibutyag ni Liza Flores, ang Chief sa Special Projects Section sa Kapitolyo nga nikabat na sa 105 ka participating agencies ang mosalmot sa HEAT caravan nga kaniadto 39 lamang sa dihang nagsugod kini.
Sama sa naandan, dad-on ang nagkalain-laing serbisyo sa kagamhanan ngadto sa katawhan nga karon masinati sa taga Trinidad ug mga kasikbit nga lungsod sa tresero distrito.
Nakig-tambayayong usab ang mga ahensiya sa kagamhanang nasyonal ug sa lalawigan, ilabi na usab ang mga pribadong sektor o hut-ong aron paghatag sa ilang serbisyo.
Ang HEAT Bohol Caravan gidayeg kaayo sa mga katawhan ug sa mga nasudnong kagamhanan, sama sa Department of Interior and Local Government (DILG) ug Department of Social Welfare and Development (DSWD) nga maoy usa sa hinungdan nga nakadawat ug nagkalain-laing pasidungog ang lalawigan sa Bohol. (PIA-Bohol/ecb/p-hd)
