TAGBILARAN CITY, January 19 (PIA)–Gibuksan na karong adlawa ang ika-17 nga Ube Festival nga gipasiugdahan sa Kagamhanang Probinsiyal sa Bohol pinaagi sa Office of the Provincial Agriculturist.
Nagdala sa tema nga “Ubing Bol-anon Dugang Palambo-on; Mga Batan-on Ang Pagpananom Buhaton,” modagan gikan karong adlawa, Enero 20 hangtud sa Enero 23, 2017 sa Plaza Rizal ning dakbayan sa Tagbilaran.
Gibuksan kini pinaagi sa motorcade nga nagsugod sa alas 12 sa udto nga naggikan sa Camp Bernido, atubangan sa Provincial Health Office (PHO) sa distrito sa Dao paingon sa Bohol Cultural Center diin gipahigayon ang opening program.
Sulod sa maong programa, gilusad usab ang International Sustainable Tourism Year 2017 sa pakig-alayon sa Bohol Tourism Office, Bohol Provincial Tourism Council Inc. ug Bohol Association of Hotels, Resorts and Restaurants.
Atol sa maong programa, simbolikanhong gihiwa ni Gob. Edgar Chatto ang usa ka ube ug gi- abrihan kini isip paglusad ning tuig 2017 isip United Nations World Tourism Organization International Year of Sustainable Tourism for Development.
Si Department of Tourism (DOT) Region 7 Director Catalino Chan III, ang pinasidunggang dinapit isip representante ni Kalihim Wanda Corazon Teo, nisaad usab nga iapil na ang Ube Festival isip usa sa mga major events sa ilang national tourism calendar.
Human sa programa nga gipahigayon sa Bohol Cultural Center, gisunod dayon ang ribbon cutting ug opening of exhibits sa Plaza Rizal.
Ang Ubifest, usa ka tinuig nga kapistahan agig pagsaulog sa lagutmon aron pagsugat sa tinuig usab nga ubi harvest.
Ang product display nagpakita sa nagkalain-laing ani sa ubi sa mga mag-uuma gikan sa mga nisalmot nga mga lungsod sa Bohol. (ecb/PIA7-Bohol)
