TAGBILARAN CITY, Bohol, June 11 (PIA)–Nakadala si Presidente Benigno “Noynoy” Aquino III og $2.5 bilyong investment gikan sa iyang biyahe sa United Kingdom ug Estados Unidos.
Matud pa sa Presidente sa iyang arrival message kagahapon sa Ninoy Aquino International Airport (NAIA), naa sa $1.5 bilyong investment ang nakuha niya sa UK ug $1 bilyong investment usab ang gisaad gikan sa US.
“Sa kabuuan po, ang halaga ng kalakal na papasok mula sa mga kumpanyang nakapulong natin sa Britanya at sa Amerika: Hindi bababa sa dalawa’t kalahating bilyong dolyar, o humigit-kumulang 100 billion pesos. Trabaho po ang katumbas ng mga numerong ito; trabahong magdadala ng pagkain sa mesa ng Pilipino. At kasabay po ng magandang balitang ekonomiko, nagbunga rin ng mas malalim pang pakikipagkaibigan ang ating pagbiyahe sa United Kingdom at sa Estados Unidos,” matud pa sa Presidente.
Gi-anunsiyo usab sa Presidente nga dili na kinahanglang mobayad pa ang Pilipinas sa $23 milyong utang niini sa US basta maadto lamang ang maong kantidad sa pagpananum og mga bag-ong punoan sa kahoy
Gitakdang modawat usab ang Pilipinas og $30 milyon ubos sa “Partnership for Growth” program aron masolbad ang kakabus sa nasud.
Nakahigayon nga maka-one-on-one meeting sa Presidente silang British Prime Minister David Cameron ug US President Barack Obama sulod sa halos usa ka semana niyang biyahe. (PIA-Bohol/ecb)
Defense alliance sa US ug PH, gipalig-on sa panagpulong nilang PNoy ug Obama
TAGBILARAN CITY, Bohol, June 11 (PIA)–Gipalig-on pagbalik nilang US President Barack Obama ug Presidente Benigno “Noynoy” Aquino III ang defense alliance sa duha ka nasud taliwala sa tensyon tali sa Pilipinas ug China kalabot sa gi-ilogang Scarborough Shoal.
Gituki usab sa duha ka lider sa ilang pagpulong sa White House ang pagpakusog sa Mutual Defense Treaty sa US ug Pilipinas ug apil na usab ang kalinaw ug seguridad sa Asia-Pacific region.
Misaad si Obama nga suportaan sa Amerika ang planong upgrade sa Armed Forces of the Philippines (AFP) ug pagpatukod og minimum credible defense posture sa Maynila.
Gihisgotan usab ni Obama ang gihatag nga ikaduhang US Coast Guard cutter sa Philippine Navy, ang planong pagtukod og bag-ong Philippine National Coast Watch System ug padayon nga bilateral military exercises ug training programs tali sa US ug Pilipinas.
Gipasalig usab si US Secretary of State Hillary Clinton nga nagpabilin ang Estados Unidos sa posisyon niining magpabilin ang freedom of navigation, respeto sa international law ug gawasnong komersyo sa rehiyon. (PIA-Bohol/ecb)