TAGBILARAN CITY, Bohol, Dec. 21 (PIA)–Nagsunod nga long weekends ang nagpaabot karong holiday season.
Base sa Proclamation Number 361 nga gipagawas sa Malakanyang, special non-working holiday sa Lunes, Disyembre 24, 2012.
Nagsunod niini ang Disyembre 25, adlaw sa Pasko nga usa ka regular holiday sa nasud.
Regular Holiday usab ang Disyembre 30, 2012 isip pagtimaan sa Rizal Day.
Una nang gideklarar nga special non-working holiday ang Disyembre 31, 2012 agig pagsunod sa Proclamation Number 295 isip katapusang adlaw sa tuig.
Regular holiday usab ang Enero 1, 2012 agig pagsaulog sa Bag-ong Tuig. (PIA-Bohol/ecb/I-gg)
Pagmonitor sa mga firecracker-related incidents,
sugdan sa DOH karong adlawa
TAGBILARAN CITY, Bohol, Dec. 21 (PIA)–Sugdan na karong adlawa sa Department of Health (DOH) ang pag-monitor sa firecracker-related incidents kalabot sa pagsaulog sa Pasko ug pagsugat sa Bag-ong Tuig.
Kahinumdoman nga gibanhaw sa DOH ang Oplan “APIR”o “Aksyon: Paputok Injury Reduction” aron mapakunhod ang gidaghanon sa mga maigo sa paboto matag holiday season.
Matud pa ni Health Secretary Enrique Ona, mo-sentro ang kampanya sa mga bata nga naa sa edad 6 hangtud 10 anyos, tungod kay base sa statistics niadtong 2011 nakapatala og 274 nga bata nga mga biktima sa paboto.
Tambag ni DOH Assistant Sec. Dr. Eric Tayag, imbes nga sugaton ang Pasko ug Bag-ong Tuig gamit ang paboto, magpahigayon na lamang og street party o dance party duyog sa sadya nga hitdance nga “Gangnam Style” o mogamit na lamang og torotot.
Pahimangno sa DOH, dili angay pasagdan kun masamdan sa pagpaboto tungod kay posibleng maule kini sa makamatay nga tetanus.
Matud pa ni Tayag nga bisan makaluwas man sa samad tungod sa pagkaigo sa paboto, mahimong mamatay sa tetanus ang usa ka nabuthan sa paboto.
Ang tetanus makuha sa bacteria sa yuta ug magpagawas kini og hilo sulod sa lawas. Kasagaran mag-lock jaw o manggahi ang apapangig ug dili maabli kun ma-tetano.
Bisan garas lamang o gamay nga samad mahimong maule sa tetanus.
Apan malikayan kini ug dili na kinahanglang problemahon pa kun molikay na lamang sa paboto. (PIA-Bohol/ecb/I-hd)
