by admin | Oct 4, 2016 | Headlines, National News
MANILA, October 4 (PIA)–Gilagdaan na ni Presidente Rodrigo Duterte ang iyang ikatulong executive order nga nag-usbaw sa combat duty pay ug combat incentive pay sa mga miyembro sa Armed Forces of the Philippines (AFP) ug Philippine National Police (PNP).
Gilagdaan ni Duterte ang Executive Order (EO) No. 3 niadtong Setyembre 26 nga nag-amyenda sa EO No. 38 (s. 2011). Epektibo kini sugod Setyembre 1 ning tuig.
Ubos sa maong EO, ang combat duty pay sa mga opisyal ug enlisted personnel sa AFP ug uniformed personnel sa PNP gi-usbaw ngadto sa fixed rate nga P3,000 matag bulan.
Kaniadto, P500 matag bulan ang combat duty pay sa AFP samtang ang maximum rate sa combat duty pay sa PNP P340 lamang matag bulan.
Ang makadawat lamang sa combat duty pay mao ang mga opisyal ug enlisted personnel sa AFP nga nagbuhat og combat duties o aktibidades ug uniformed personnel sa PNP nga nalambigit sa aktuwal nga police operations nga ilatid sa patakaran nga ipagawas sa Secretary of National Defense ug sa National Police Commission.
Samtang ang mga miyembro sa AFP ug uniformed personnel sa PNP nga nalambigit sa aktuwal combat batok sa nagkalain-laing insurhente, terorista, ug mga dakponong elemento, makadawat og dugang combat incentive pay nga P300 matag adlaw.
Ang combat duty pay alang sa mga sundalong naa sa lugar diin adunay pakigbugno samtang ang combat incentive pay usab dugang bayad alang sa mga sundalong aktuwal nga nakigbugno o naa sa combat zone matag adlaw. (ecb/PIA7-Bohol)
by admin | Oct 4, 2016 | Headlines, National News
MANILA, October 4 (PIA)–Gitudlo isip bag-ong administrator sa Overseas Workers Welfare Administrator (OWWA) si Hans Leo Cacdac.
Hulipan ni Cacdac si kanhi OWWA administrator Rebecca Calzado nga mabalhin usab sa Technical Education and Skills Development Authority (TESDA).
Ang pagtudlo kang Cacdac isip bag-ong OWWA administrator gi-anunsyo ni Department of Labor and Employment (DOLE) Kalihim Silvestre Bello III sa gipatawag nga press conference kalabot sa accomplishment reports sa buhatan kalabot sa nagkaduol nga unang 100 ka adlaw sa Duterte Administration.
Si Cacdac mi-alagad isip POEA administrator sukad pa niadtong 2012 sa panahon ni kanhi Presidente Benigno Aquino III.
Samtang hulipan si Cacdac isip POEA administrator ni Atty. Claro Arellano nga kasamtangang prosecutor general sa Department of Justice (DOJ). (ecb/PIA7-Bohol)
by admin | Oct 3, 2016 | Headlines, National News
MANILA, October 3 (PIA)–Gipugngan una sa Commission on Elections (Comelec) ang planong pag-abli og balik sa voter’s registration karong adlawa, Oktubre 3, alang sa 2017 Barangay ug Sangguniang Kabataan Elections.
Matud pa sa tigpamaba sa Comelec nga si Atty. James ¬Jimenez, kini tungod kay wala pa padayong mapalabang ang balaodnong mag-oktaba sa 2016 Barangay ug Sangguniang Kabataan Elections.
“We can only resume registration after the law postponing the Barangay and SK elections have been passed,” matud pa ni Jimenez.
Gipaabot usab ni Jimenez nga makapagawas na sila og opisyal nga resolusyon sa pagpabalik sa voter’s registration sulod sa usa hangtud sa duha ka semana.
Kahinomdoman nga gipahayag sa Comelec nga plano nilang ipadayon ang voter’s registration karong adlawa, Oktubre 3 nga molanat hangtud sa Abril 29, 2017.
Ang bag-ong voter’s¬ registration ipahigayon sa Comelec agi og pagsunod sa Republic Act 8189 o ang Voter’s Registration Act of 1996.
Kini human nga napalabang sa ubos balay balaoranan ug taas nga kapolungan sa Kongreso ang balaodnong nag-oktaba sa 2016 Barangay ug Sangguniang Kabataan Elections nga gitakda untang ipahigayon sa Oktubre 31 ning tuig. (ecb/PIA7-Bohol)
by admin | Oct 3, 2016 | Headlines, Health and Medicine, National News
MANILA, October 3 (PIA)–Nabalaka na usab ang Department of Education (DepEd) sa pagdaghan sa mga nataptan sa sakit nga Zika virus sa nasod.
Tungod niini, gitahasan ni DepEd Kalihim Leonor Briones ang tanang school official sa tibuok nasod nga motabang sa Department of Health (DOH) sa information campaign kun unsaon makalikay sa sakit nga zika virus nga gikan sa pinaakan sa lamok.
Nagpagawas na og memorandum si Briones nga nagmando sa tanang school superintendents, principals ug mga magtutudlo sa paghimo og mga lakang ug itudlo sa mga tinun-an kun unsaon paglikay sa maong sakit.
Matud pa ni Briones, mahinungdanon ang pagbaton og kaalam sa mga tinun-an kun unsaon paglikay sa sakit nga Dengue ug Zika virus ug kun unsaon pagtabang niining magpabilin ang kahinlo sa palibot.
Ang sakit nga zika dala sa zika virus (miyembro sa pamilyang Flavivirus), usa ka virus nga dala sa usa ka babayeng lamok nga Aedes aegypti. Kini usab ang matang sa lamok nga nagdala sa sakit nga dengue fever.
Kasagarang sintomas niini mao ang mura og trangkaso. May sintomas usab kini nga murag gi-dengue apan negatibo sa dengue test.
Makasinati og hilanat, pantal-pantal o rashes, pagsakit sa kalutahan, ug pagpamula sa mata nga murag sore eyes. Kining mga sintomas kasagarang molanat sa pipila ka adlaw hangtud usa ka semana gikan sa pagkapaak sa lamok. Susihon kini pinaagi sa dugo, ihi o laway kun positibo sa zika virus. (ecb/PIA7-Bohol)
by admin | Oct 3, 2016 | Headlines, Local News / Bohol Balita
TAGBILARAN CITY, October 3 (PIA)–Human sa pipila ka tuig nga nahimong runner-up sa mga niaging national search, nakab-ot ra gayud sa Pamilya Garay gikan sa Bohol ang kadaogan sa Central Visayas region human sila napiling Huwarang Pantawid Pamilya 2016.
Si Department of Social Welfare and Development (DSWD) Kalihim Judy Taguiwalo mismo ang nitunol sa plaque of recognition ug ganting salapi nga nagkantidad og P30,000.00 ngadto sa Pamilya Garay isip national winner sa Huwarang Pantawid Pamilya 2016.
Ang top 5 finalists nga napili gikan sa 18 ka Regional winners mao ang: Pamilya Bulso gikan sa Dipaculao, Aurora; Pamilya Castillo sa Lemery, Batangas; Pamilya Masamoc sa Aroroy, Masbate; Pamilya Tacda sa Nueva Valencia, Guimaras; ug Pamilya Garay sa Jagna, Bohol.
Ang national awarding gipahigayon sa syudad sa Quezon niadtong Oktubre 1 nga gitunong sa culmination sa Family Week celebration nga gisaulog matag katapusan nga semana sa Setyembre.
Si Vicente ug Marissa Garay, gikan sa Can-upao, lungsod sa Jagna ning lalawigan adunay pito ka anak.
Si Ivy ang ilang kamagulangan, gipaabot nga matapos sa electrical engineering karong bulana. Sunod niya si Rose Marie nga naa na karon sa 3rd year college nga nikuha sa kursong Bachelor of Education. Samtang si Prince nga naa pa sa day care ug ang ilang kamanghuran nga si Vincent Ian nga lima ka bulan pa lamang.
Ug ang ubang anak nila nga sila Aria Venice, Lee Mark ug Vic Jun mga children-beneficiaries sa Pantawid Pamilyang Pilipino program nga nagtungha sa Bohol Institute of Technology-Jagna ug Jagna Central Elementary School.
Si Vicente usa ka active religious leader ug usa ka mangingisda samtang si Marissa usa ka katabang sa panimalay. Benepisyaryo sila sa Pantawid Pamilya program sukad 2012.
Ang Pantawid Pamilya mao ang conditional cash transfer sa gobyerno nga namuhunan sa edukasyon ug panglawas sa kabos nga mga pamilya nga adunay mga anak nga may edad 0 hangtud 18 ka bulan.
Ang Huwarang Pantawid Pamilya usa ka tinuig nga pagpangita sa DSWD og mga pamilyang adunay lig-on ug hugot nga relasyon, nagpakita og maayong pamatasan ug may positibong impak sa komunidad diin sila nagpuyo. (ecb/PIA7-Bohol)
