by admin | Oct 26, 2016 | Headlines, Local News / Bohol Balita
TAGBILARAN CITY, October 26 (PIA)–Gitakda na sa Commission on Elections (Comelec) ang pagbukas og balik sa voters registration sa sunod buwan alang sa Barangay ug Sangguniang Kabataan (SK) elections.
Base sa resolusyon en banc nga gipagawas sa Comelec, sa Nobyembre 7 o halos duha ka semana gikan karon ibalik sa pagpa-rehistro sa mga botante nga molanat taman sa Abril 29 sa sunod tuig.
Matud pa nga mas gi-uswag sa Comelec ang registration aron masiguro ang partisipasyon sa mas daghan pang botante.
Subling gi-schedule ang voters registration human milusot sa Senado ug Kamara ang balaodnon nga i-oktaba ang maong eleksyon nga gi-uyonan usab ni Presidente Rodrigo Duterte.
Tungod niini, gipaabot ang dugang tulo ka milyong magparehistro sa barangay election ug duha ka milyon usab alang sa SK.
Matud pa sa Comelec nga sa gipahigayong registration niadtong Hulyo 15 hangtud 30, naa sa tulo ka milyong mga botante ang nagpatala sa tibuok nasod. (ecb/PIA7-Bohol)
by admin | Oct 26, 2016 | Headlines, Local News / Bohol Balita
TAGBILARAN CITY, October 26 (PIA)–Karon pa lang, nanawagan na ang Philippine Coast Guard (PCG) sa mga pasahero nga mopaule sa ilang mga lalawigan karong panahon sa Kalag-kalag nga dili mosakay sa mga kolurum nga sakyanang pangdagat.
Matud pa sa tigpamaba sa Coast Guard nga si Commander Armand Balilo, kini aron malikayan nga mabutang sa kakuyaw ang kinabuhi sa mga pasahero sa mga sakyanang pangdagat.
Gipasabot ni Balilo nga gawas sa walay safety gadgets ang mga kolurum nga bangkang de motor, wala usab kini manifesto mao nga walay insurance ug dili moagi sa inspection sa ilang mga kawani.
Dungan niini, gibutang na karong adlawa sa heightened alert sa PCG ang ilang tropa sa tibuok nasod.
Gipaabot sa PCG nga mahimong triple ang gidaghanon sa mga pasahero karon tungod sa taas nga adlaw sa bakasyon kun itandi sa niaging tuig.
Matud pa nga pagmatuod lamang niini mao ang giingong fully-booked na ang mga shipping lines karon pa lamang.
by admin | Oct 26, 2016 | Headlines, Local News / Bohol Balita, Major Events, World
TAGBILARAN CITY, October 26 (PIA)–Tungod sa nagsingabot nga Pasko, maayong balita ang gipahibalo karon sa Philippine Postal Corp. ngadto sa publiko nga tigpadala pinaagi sa koreo o Post Office nga ang mga padala gikan sa ubang nasod nga nagkantidad og P10,000 paubos, tax free na karon.
Kini base sa bag-ong probisyon sa balaod ubos sa bag-ong Customs Modernization and Tariff Act (CMTA) nga gilagdaan niadtong Mayo 30, 2016 isip Republic Act (RA) 10863, aron e-rebisar ang 38-ka tuig nga Tariff and Customs Code sa Bureau of Customs (BOC) nga gipalabang niadtong 1978, aron mahatagan ang mga ordinaryong katawhan, overseas Filipino workers ug konsumidor nga mogamit sa serbisyo postal sa nasod.
Matud pa sa Chapter 3. Section 423. Determination of the De Minimis Value.— “ No duties and taxes shall be collected on goods with an FOB of FCA value of ten thousand pesos (P10,000) or below. The Secretary of Finance shall adjust the de minimis valued as provided herein, every three (3) years after the effectivity of this Act.
Nahimo kining epektibo kagahapon, Oktubre 25, 2016 human ang kinse (15) ka adlaw nga pagpamantala sa official gazette.
Sa bag-ong balaod, gisaka ang “tax-free cap” sa mga pakete nga ginapadala sa mga OFWs pinaagi sa Post Office.
Dako og mapahimos ang mga OFWs niining bag-ong balaod tungod kay mahimo na sila makapadala og mga personal items sa ilang mga minahal sa kinabuhi sa Pilipinas pinaagi sa koreo nga dili na buhisan basta ang mga ipadala dili molapas sa presyong gitakda ug wala gidili sa balaod.
Ang balaod sa “minimum thresholds” o ang “de minimis” mao ang gitakdang kantidad nga buhisan sa mga ipasulod o gipadala sulod sa nasod.
Ang Pilipinas nagtakda og minimum “thresholds” aron ang tanang ubos og kantidad nga ipasulod o ipadala nga moabot sa nasod mahimong “duty ug tax free”.
Gawas sa mga pantalan ug tugpahanan, moagi sa Post Office ang mga pakete ug sulat gikan sa ubang nasod nga kasagaran pahamtangan og buhis sa BOC base sa kantidad sa gipadala. (ecb/PIA7-Bohol)
by admin | Oct 25, 2016 | Features, Headlines, Local News / Bohol Balita, Major Events
TAGBILARAN CITY, October 25 (PIA)–Nagpagawas na og pay rules ang Department of Labor and Employment (DOLE) isip pahinumdom sa pribadong sektor sa pag-obserbar sa saktong pay rules ug core labor standards sa Oktubre 31 ug Nobyembre 1 nga gi-deklarar isip special non-working days.
Ang DOLE nipagawas sa Labor Advisory No. 15, Series of 2016 o Guidelines on the Payment of Wages for the Special Non-Working Days on October 31 and November 1, 2016.
Ang Oktubre 31 (Additional non-working day) ug Nobyembre 1 (All Saints Day) gi-deklarar nga special non-working days base sa Proclamation 1105, Series of 2015.
Kun ang empleyado dili mosulod sa trabaho niining mga petsaha, ipatuman ang “no work, no pay” nga palisiya gawas lamang kun adunay paborable nga palisiya, praktis, o collective bargaining agreement (CBA) nga mohatag og sweldo sa special non-working days.
Kun mo-trabaho sa maong mga adlaw, ang empleyado bayran og dugang 30 porsiyento sa iyang inadlaw nga suholan sa unang walo (8) oras nga pagtrabaho (Daily Rate x 130% + COLA scheme).
Alang sa mo-trabaho og lapas walo (8) ka oras (overtime work), ang empleyado pagabayaran og dugang 30 porsiyento sa iyang inoras kun hourly rate sa maong adlaw (Hourly rate of basic daily wage x 130 % x 130 % x number of hours worked).
Kun mo-trabaho atol sa special day nga natunong sa rest day sa empleyado, bayran sila og dugang 50 porsiyento sa ilang inadlaw nga suholan sa unang walo (8) ka oras nga pagtrabaho (Daily Rate x 150 % + COLA).
Samtang alang sa pagtrabaho og lapas sa walo (8) ka oras kun overtime work atol sa special day nga natunong usab sa rest day sa empleyado, bayaran sila og dugang 30 porsiyento sa ilang inoras nga suholan (Basic daily wage x 150% x 130% x number of hours worked). (ecb/PIA7-Bohol)
by admin | Oct 25, 2016 | Headlines, Local News / Bohol Balita, Major Events
TAGBILARAN CITY, October 25 (PIA)–Dawaton na sa Department of Foreign Affairs (DFA) isip nag-unang ID requirement sa pagkuha og pasaporte ang bag-o ug modernong postal ID sa Philippine Postal Corp.sa tanang buhatan niini sa tibuok nasod.
Matud pa sa PhilPost, gi-ila na sa DFA ang bag-ong postal ID tungod sa gibag-o nga pisikal ug biometrics based nga security feature niini.
Mahimo na usab dawaton ang bag-ong postal ID alang sa passport application sa mga satellite offices sa Metro Manila ug apil na usab sa mga regional consular offices ug mga foreign service posts.
Kasamtangan na usab gitarong karon ang ePassport Application Forms aron mauban sa listahan sa mga ginadawat nga primary ID alang sa passport application kauban na ang postal ID.
Ang postal ID usa sa mga government-issued ID nga gi-ila na karon sa mga institusyon isip kamatuoran sa kailhanan ug address.
Mahimo nang mo-aplay sa bag-ong postal ID sa tibuok nasod human gibuksan sa niaging tuig ang pipila ka buhatan sa PhilPost alang sa digital processing sa mga aplikasyon alang sa bag-o ug modernong postal ID card.
May bayronon nga P504.00 alang sa maong bag-ong postal ID ug renewable kini matag tulo ka tuig. (ecb/PIA7-Bohol)
