TULO pa ka task forces ang na-umol samtang utingkayon ang mga buhaton kalabot sa pagkalunod ug pagpang-ugkat sa mga biktima sa natundag nga Princess of the Stars.
Matud ni Transportation Undersecretary Elena Bautista, ang mga task forces mahipno kon matino na ang suporta gikan sa international communities.
Kini mao nga task forces mao ang hazardous materials (HAZMAT) kinsa maoy maghupot sa anggulo sa toxic materials gikan sa nalunod nga barko, ang Disaster Victim Identification (DVI) ug ang Psychosocial program (PSP) nga maoy saligan sa paghatag ug tambag sa mga kabanay sa mga biktima.
Kining tulo ka sub-task forces maoy moabag sa naha-unang task forces sa search and rescue ug recovery (SAR) ug relief and rehabilitation, kins una na nga na-umol.
Matud ni Bautista, alang sa Hazmat, nakigsabot na ang nasud sa World Health Organization ug sa United nations environment unit kalabut sa tukmang pag-handle sa water samples.
Alang sa DVI, siya mibutyag nga ang Interpol (International Criminal Police Organization) magpadala ug 3,000 ka DNA testing kits samtang ipadala sa Saravejo, Bosnia Herzegovina, ang mga bukog sa mga biktima aron tukma kining mailhan pinaagi sa siyensa. Ang kagamhanan sa Canada usab mipasalig na sa pagtabang sa pag-ila sa mga biktima pinaagi sa dental files sa mga na-ugkat nga biktimang wa pa hi-ilhi.
Sumpay ni Bautista nga pasugdan na ang pagpalutaw ug balik sa barko samtang gipa-abot nga kini matapos sulod sa usa ngadto sa tulo ka buwan. (rachiu/PIA)