TAGBILARAN CITY, Bohol, Oct. 01 (PIA)–Upat ka long weekends ang nagpaabot sa 2014.
Base kini sa Proclamation Number 655 nga gilagdaan ni Presidente Benigno ‘Noynoy’ Aquino III niadtong Setyembre 25.
Magsugod ang long weekend sa buwan sa Enero tungod sa Chinese New Year sa Enero 31 nga usa ka Special Non-Working Day ug natunong sa adlaw nga Biyernes.
Sama sa naandan, long weekend usab ang Hoy Week sa Abril 17 (Holy Thursday) ug Abril 18 (Good Friday) nga parehong Regular Holidays. Samtang Special Non-Working Day usab ang Black Saturday sa Abril 19.
Adunay long weekend na usab sa buwan sa Agosto diin ang Agosto 25 nga natunong sa adlaw nga Lunes, usa usab ka Regular Holiday tungod kay National Heroes Day kini.
Mahimong lima ka adlaw ang bakasyon alang sa Pasko tungod kay wala may trabaho sa Disyembre 24 (Miyerkoles) ug Disyembre 26 (Biyernes) nga mga additional Special Non-Working Days.
Samtang magpagawas og lahing proklamasyon ang Malakanyang alang sa tukmang petsa alang sa Islamic holidays nga Eid’l. Fitr ug Eidul Adha. (ECB/PIA7-Bohol)