TAGBILARAN CITY, July 25 (PIA)–Epektibo sa unang adlaw sa Agosto, magamit na sa publiko ang “911” isip national emergency hotline number.
Sa memorandum nga gipagawas sa National Telecommunications Commission (NTC), ilang gitahasan ang tanang mga telecommunication companies sa nasod nga mosunod sa maong special hotline.
Ang 911 maoy ihulip sa Patrol 117 nga una nang gimugna ubos sa buhatan sa Department of Interior and Local Government (DILG).
Nagpasabot kini nga ang 911 ang numero nga angay tawagan sa publiko alang sa paspas nga pagresponde sa mga polis, bumbero ug emergency medical personnel sa kagamhanan.
Nanawagan usab ang NTC sa publiko nga likayan ang prank call sa maong numero tungod kay giseguro nilang ma-trace gayud nila kun kinsa man ang mohimo niini.
Kahinumdoman nga gimando ni Presidente Rodrigo Duterte ang paggamit sa 911 isip emergency number tungod kay napamatud-ang epektibo kini ug gigamit sa lokal nga kagamhanan sa syudad sa Davao. (ecb/PIA7-Bohol)