TAGBILARAN CITY, Bohol, Oct. 17 (PIA)–Mikabat na sa 1,337 aftershocks ang natala ganinang buntag sa lalawigan sa Bohol human nitay-og ang magnitude 7.2 nga linog dinhi niadtong Martes, Oktubre 15.
Matud pa ni Karen Garcia, Data Management sa Philippine Institute of Volcanology and Seismology (PHIVOLCS), natala ang pinakakusog nga pagtay-og sa magnitude 5.5 nga linog ganinang alas 7:37 sa buntag.
Dugang pa ni Garcia, human sa maong pagtay-og, natala usab ang magnitude 4.5 nga linog sa Tagbilaran City ganinang alas 1:46 sa hapon.
Gibutyag usab sa opisyal sa PHIVOLCS nga upat pa ka nagsunod nga kusog nga aftershocks sa syudad sa Tagbilaran ang natala sukad kagahapon sa buntag.
Giingong makasinati pa og mga aftershocks ang mga Bol-anon sulod sa usa ka buwan apan magkahinay na kini.
Samtang gitin-aw usab sa PHIVOLCS nga walay bulkan sa isla sa Bohol sukwahi sa nikatap nga mga balita nga adunay aktibo nga bulkan sa Bohol nga maoy hinungdan sa kusog nga pagtay-og sa linog niadtong Martes.
Gipasabot usab sa PHIVOLCS nga ang giingong nanggawas nga kolor yellow nga tubig sa dagat sa lungsod sa Loon gitawag nga liquefaction og kasagarang manggawas human sa kusog nga linog susama sa nitay-og sa lalawigan sa Bohol niadtong Martes. (PIA7-Bohol/ECB)
