TAGBILARAN CITY, Bohol, Oct. 20 (PIA)–Gitay-og na usab sa tulo ka aftershocks ang lalawigan sa Bohol.
Matud pa ni Philippine Institute of Volcanology and Seismology (Phivolcs) Dir. Renato Solidum sa usa ka radio interview, mas kusog kini kun itandi sa mga natala sa mga niaging adlaw.
Unang nasinati sa mga Bol-anon ang magnitude 5.4 mga alas 7:03, gisundan sa magnitude 4.9 mga alas 7:34 ug ang ikatulo ang magnitude 5.2 ganinang alas 9:12 sa buntag.
Sa pagkakaron, mikabat na sa 2,193 aftershocks ang natala sukad nitay-og ang linog niadtong Oktubre 15, 2013.
Kalabot niini, gipasabot usab ni Solidum ang kalabot sa nagkadaghang buho nga gisaypan isip sinkhole nga gimugna sa linog, samtang ang uban gikasaypan nga adunay mitubong bulkan.
Gitataw ni Solidum nga walay namugnang bulkan ang 7.2 magnitude nga linog apan giingong nangita lamang og maagian ang tubig human mabag-o ang porma sa mga bato.
Gihimakak usab sa Phivolcs ang mga nikatap nga balita pinaagi sa text ug sa social media kalabot sa giingong magnitude 8 nga linog nga motay-og na usab sa Bohol.
Matud pa, dili matagna ang linog ug ang mga nasinati karon, mga aftershocks lamang nga dili na mokusog pa sa 7.2 magnitude nga linog niadtong Oktubre 15. (PIA-Bohol/ecb)
