USA ka Bol-anong lider sa mga kabatan-onan maoy mo-padayag sa duha ka dagkong sugyot sa mga kabatan-onang Pilipino ngadto sa Association of South East Asian nations Senior Officials Meeting on Youth (SOMY) sa Changmai ug Bangkok sa Thailand.
Si National Youth Commissioner sa Visayas Benjie Oliva kinsa mao usab ang representante sa nasud makigtigum sa mga opisyales sa ASEAN lakip na ang China, Japan ug Korea sugod karon, Hunyo 1-6, 2008.
Itanyag ni Comm. Oliva ang laraw nga ipatuman ang ASEAN Ten Accomplished Youth Organizations (ASEAN-TAYO) ug ang ASEAN Youth Summit.
Kini nga duha ka programa sa kabatan-onan, una na nga gipatuman sa Pilipinas ug naka-ani ug pagdayeg sa kadaghanan.
Dungan niini, maghatag usab si Oliva sa mga katikaran sa nasabutan sa mga ASEAN youth officials human sa nahitabo nga bansaybansay sa pag-ugmad sa batakan alang sa Coaching ug Mentoring sa mga out of school youth kabahin sa pagpamuhunan.
Kini nga kasabutan naaprobahan niadtong katapusang APEC-HRD nga tigum dinhi sa Bohol Beach Club, Panglao, Bohol niadtong March 2008.
Ang ASEAN Senior Official Meeting on Youth (SOMY) matud ni Oliva, gimugna isip maoy higher level nga pundok nga magtuki sa kaparehas nga mga sulirang sosyal sa mga kabatan-onan sa mga sakop nga nasud.
Dugang niya, ang SOMY sakop na sa ASEAN institutional framework nga magtaho sa mga pangulo sa ASEAN pinaagi sa ASEAN Ministerial Meeting. (rachiu/PIA)
