IPADALA sa Commission on Human Rights (CHR) ang mga imbestigador ngadto sa Mindanao aron sutaon kon may kamatuoran bang ang Moro Islamic Liberation Front (MILF) migamit sa mga batan-ong sundalo bisag supak sa international nga mga balaod sa tawhanong katungod.
Hinuon, si CHR Chairman Leila de Lima midugang nga nagpangita pa sila ug paagi nga ikapadangat kining hisgutanan sa mga lider sa MILF.
May mga nanggawas na nga television footages nga naghulagway sa mga bata nga naghupot ug mga armas samtang nagsul-ob sa uniporme sa MILF didto’s usa ka kampo sa MILF.
Subay sa international principles, ang paggamit sa mga bata supak sa child labor ug paglapas sa katungod sa kabataan, bisan pag ang mga bata mismo ang mitanyag sa ilang serbisyo, matud ni de Lima.
”Hinuon, himoon ang pagtuki sa paagi na isipon sa mga sakop sa MILF nga ang mga imbertigador sa CHR gikan sa usa ka independenteng bahan aron sila tahoron ug tabangan”, butyag ni de Lima. (rachiu/PIA)
