MANILA, Jan. 17 (PIA)–Giseguro karon sa Malakanyang nga dili magamit ang mga substandard nga puthaw ug ubang materyales sa mga gitukod nga mga edipisyo nga naigo sa kalamidad.
Una nang nabulgar ang pagkuyanap sa mga substandard nga mga puthaw sa merkado ug isip pagmatuod niini ang pahayag mismo ning bag-o lang sa Philippine Iron and Steel Institute (PISI) nga maong daghang mga edipisyo ang nangahugno sa magnitude 7.2 nga linog sa Bohol ug sa bagyong Yolanda sa Eastern Visayas tungod sa mga puthaw nga gipanggamit didto.
Matud pa ni Presidential Communications Operations Office (PCOO) Sec. Sonny Coloma, dili kini tugotan sa Department of Public Works and Highways (DPWH) tungod kay hugot nga gipatuman sa gobyerno ang mga sumbanan aron lig-on ang mga edipisyo nga ipatukod sama nalang sa mga gitukod karon sa Bohol ug Eastern Visayas.
“Hugot nga gipatuman sa DPWH ang mga sumbanan aron mahimong ‘disaster resilient’ ang mga edipisyong itukod. Gipatuman kini sukad pa niadtong linog sa Bohol ug apil na ang mga lugar nga naigo sa bagyong Yolanda,” matud pa ni Coloma. (PIA7-Bohol/ECB)
