TAGBILARAN CITY, Bohol, Jan. 17 (PIA)–Usa ka Bol-anon nga beterano isip field investigator ug abogado ang natudlong bag-ong pangulo karon sa National Bureau of Investigation (NBI).
Si Deputy Director for Regional Services Virgilio Mendez na ang direktor karon sa NBI nga taga Bayongan, lungsod sa San Miguel, Bohol.
Si Mendez nanumpa sa katungdanan atubangan ni Justice Secretary Leila de Lima kagahapon, susamang petsa niadtong 1978 diin nisulod siya sa maong buhatan isip NBI Agent I.
Sa iyang 36 ka tuig nga pag-alagad sa maong buhatan, si Mendez nakasikop og mga suspetsado sa mga high-profile nga kaso.
Apil sa mga malampusong pagsikop nga naghatag ni Mendez og pasidungog mao ang: Guialaludin ‘Boy Muslim’ Otto, nga wanted sa 2 counts of murder, Abdulgani “Abdul Malang” Abas kansang pagkasikop nakaingon sa interception sa mga improvised explosive device, ug ang mga suspetsado sa brutal nga pagpatay ni Kristelle “Kae” Devantes.
Niadtong 2011, natudlo siya sa kanhi posisyon isip deputy director for regional operations services. Natudlo siya isip NBI Regional Director sa Rehiyon 10 niadtong 2004.
Si Mendez usab ang responsible sa pagkasikop sa mga suspetsado sa pagkamatay ni Lingayen Vice Mayor Ramon Arcinue ug sa iyang asawa. Siya usab ang lead investigator sa Atimonan shootout ug personal nga nitutok sa imbestigasyon sa Cagayan De Oro bombing.
Siya usab ang nangulo sa imbestigasyon sa gituhuang rice smuggler nga si David Tan.
Natapos ni Mendez ang pagtungha sa sekondarya sa Immaculate Heart of Mary Seminary sa syudad sa Tagbilaran ug nilampos usab siya sa iyang pagtuon sa abogasya sa Divine Word College sa ning syudad.
Gihulipan ni Mendez si Atty. Medardo de Lemos nga nitindog isip OIC sa buhatan human niluwat sa pangatungdanan si NBI Chief Nonnatus Rojas niadtong Setyembre.
Tungod niini, ang Provincial Peace and Order Council atol sa tigom kagahapon mipasar og usa ka resolusyon nga nagdayeg sa nakab-ot ni Mendez sa natad sa panerbisyo sa katawhan.
Ang maong PPOC meeting gipangunahan ni Gob. Edgar Chatto nga mao usab ang nag-abogar sa maong resolusyon alang kang Mendez, kinsa usa sa mga “Outstanding Boholano” nga gipasidunggan atol sa Bohol Day niadtong tuig 2012. (PIA7-Bohol/ECB)
