MANILA, Jan. 20, 2014 (PIA)–Taliwala sa nagkadaghang kaso sa tipdas sa nasud, wala gi-rekomendar sa Department of Health (DOH) ang pagpalit og mga tambal ug bakuna sa mga online shop tungod kay posibleng peke ang produktong mapalit.
Matud pa ni DOH Assistance Secretary Eric Tayag, mas maayo pa gihapon nga moadto sa mga health center o doktor aron masusi ug mabakunahan.
“Huwag kayong kukuha ng bakunang peke… pumunta po kayo sa health center o kaya sa linsensyadong doktor para ‘di kayo naloloko,” matud pa ni Tayag.
Gitataw usab ni Tayag nga libre lamang og walay bayad ang pagpabakuna sa mga health centers.
Una niini, tungod sa padayong pagdaghan sa nataptan sa sakit nga tipdas sa nasud, gi-aghat sa DOH ang mga ginikanan nga pabakunahan ang ilang mga anak aron makalikay niini.
Niadtong Disyembre, nipagawas og pasidaan ang Food and Drug Administration (FDA) sa publiko batok sa pagpalit og mga tambal ug bakuna sa mga online shop.
Ang maong pasidaan gihimo sa FDA human madiskubre niadtong Nobyembre 2013 nga adunay kapin sa 100 ka prescription medicines ug biological products alang sa mga tawo ug mananap ang gitangtang sa online buy-and-sell website nga sulit.com.ph tungod kay giingong dili luwas gamiton.
Gipaabot pa sa DOH ang listahan gikan sa FDA sa mga advertisment nga kinahanglan pa nilang tangtangon.
Bisan pa niini, gipasalig ni Tayag nga padayon ang himuong monitoring sa DOH sa pagbaligya og bakuna ug uban pang mga tambal sa internet. (PIA7-Bohol/ECB)
