MANILA, Jan. 29, 2014 (PIA)–Nahisgotan ang Pilipinas ni US President Barack Obama atol sa iyang ika-unom nga State of Union Address kagahapon diin misaad kini nga padayon ang tabang sa Estados Unidos sa mga kaalyado niining nasud ilabi na sa mga biktima sa kalamidad dungan sa paghisgot sa Pilipinas.
Matud pa ni Obama nga padayon ang pagtutok sa Estados Unidos sa Asia-Pacific taliwala sa tensyon tungod sa territorial dispute sa China ug mga silingang nasud niini.
“And we will continue to focus on the Asia-Pacific, where we support our allies, shape a future of greater security and prosperity, and extend a hand to those devastated by disaster – as we did in the Philippines, when our Marines and civilians rushed to aid those battered by a typhoon, and were greeted with words like, ‘We will never forget your kindness’ and ‘God bless America!,” matud pa sa pahayag ni Obama.
Una nang nihatag ang Estados Unidos og $20 milyong humanitarian aid pila ka adlaw human sa pagpanghasi sa bagyong “Yolanda” nga nisaka pa sa $37 milyon.
Gipadala usab sa Amerika ang ilang USS George Washington ug carrier strike group aron motabang sa relief efforts.
Sa talaan sa Pentagon, giingong nakaresponde na sa 40 ka kalamidad sa Pilipinas ang Estados Unidos sukad sa tuig 1990. (PIA7-Bohol/ECB)
3% nga pag-uswag sa sektor sa agrikultura, target sa DA
MANILA, Jan. 29, 2014 (PIA)–Target sa Department of Agriculture (DA) nga makab-ot ang 3% nga pag-uswag sa sektor sa agrikultura alang sa pagpakusog sa produksyon sa pagkaon sa nasud alang ning tuig 2014.
Matud pa ni Agriculture Secretary Proceso Alcala, kalabot kini sa gipahigayon nilang pagpatuman sa mga programa nga magpakusog sa sector.
Gitumbok sa kalihim ang mga potensyal nga makab-ot sa tulo ka porsyentong pag-uswag mao ang sektor sa pangisdaan tungod sa pagbaton og balik sa kahigayonan nga makapangisda og tuna sa may parte sa pocket 1 sa kadagatan sa Pasipiko, apil na ang vannamei o pasayan nga nagkadaku ang panginahanglan sa supply sa ubang nasud sama sa nasud sa Japan, Hongkong, Singapore ug Estados Unidos.
Target usab sa DA nga maka-ani og humay gikan 19.5-milyong metriko tonelada hangtud 20-milyong metriko tonelada karong tuig aron malabwan ang 100% nga rice self-sufficiency. (PIA7-Bohol/ECB)
