MANILA, Mar. 5, 2014 (PIA)–Giseguro sa Malakanyang nga padayon ang land reform ubos sa Comprehensive Agrarian Reform Program Extension with Reforms (CARPER) bisan gitakdang matapos na kini karong Hunyo.
Matud pa ni Kalihim Herminio “Sonny” Coloma, Jr. sa Presidential Communications Operations Office (PCOO) nga ang land reform program magpadayon bisan human sa termination date niini ilabi na nga adunay mga land owners ang wala pa nakadawat sa ilang notices of termination.
Giingong sama sa gipasabot na ni Agrarian Reform Secretary de los Reyes, ubos sa gipatuman sa balaod sa Republic Act 9700, Section 30 diin nakalatid nga “land acquisition and distribution may proceed for land holdings with pending proceedings even after June 2014.”
Kalabot sa pagtabang sa mga benepisyaryo sa reporma sa yuta, gibutyag ni Coloma nga ang Department of Agrarian Reform (DAR) nimugna og usa ka grupo nga motutok lamang sa support services. Ang maong grupo ang nakig-alayon sa nagkalin-laing ahensiya sa gobyerno sama sa Land Bank of the Philippines ug Cooperatives Development Authority aron tabangan ang mga benepisiyaryo nga magtukod og kaugalingon nilang mga kooperatiba.
Matud pa nga karong tuig, mosalmot ang Pilipinas sa International Year of the Family Farm.
Tungod niini, gi-awhag ang pagpalambo ug pagbaton og family farms alang sa mas daghan pang Pilipino nga mosalmot sa pagpanguma.
Base sa datos sa Department of Agriculture (DA), 55 anyos pasaka ang average age sa Filipino farmers mao nga angay palapdan pa ang gitawag nga base of farmers sa nasud apil na ang nahisulod sa younger age group. (PIA7-Bohol/ECB)
