MANILA, April 02, 2014 (PIA)–Gitambagan sa Department of Health (DOH) ang publiko nga mag-amping batok sa rabies ilabi na karong ting-init.
Matud pa sa DOH, ang pagsaka sa kaso sa rabies mahitabo sa panahon sa ting-init tungod kay giingong iritable ang mga iro ug adunay posibilidad nga mamaak kini.
Tambag pa sa DOH, angay siguradohong napabakunahan ang mga binuhing iro ug dili kini angay pasagdan nga maglaroy-laroy.
Bisan ang mga ginikanan, gitambagan usab nga bantayan ang ilang mga anak ug dili pasagdan nga maglaroy-laroy sa kadalanan diin mahimong makasugat og mga layaw nga iro.
Giingong kun mapaakan og iro, angay dalhon dayon ang pasyente sa pinakaduol nga tambalanan aron mapatambalan dayon kini. (PIA7-Bohol/ECB)
