PNoy ngadto sa LGUs:
undanga na ang ‘KBL’
MANILA, Oct. 03 (PIA)–Gi-awhag ni Presidente Benigno ‘Noynoy’ Aquino III ang mga lokal nga opisyal partikular ang mga miyembro sa Union of Local Authorities of the Philippines (ULAP) nga undangon na ang naandan nga paghatag og tabang sa giingong “KBL” o kasal, bunyag ug lubong.
Gihimo ni PNoy ang maong pahayag atol sa pagpanumpa sa mga opisyal sa ULAP nga gilangkoban sa mga gobernador ug mga mayor sa lalawigan.
Matud pa ni PNoy nga panahon na aron itutok ang pondo sa gobyerno sa mga mahinungdanong proyekto nga mas mapahimoslan sa katawhan.
Dugang pa ni PNoy nga imbes manghatag og mga dinaliang tabang sama sa amot o barangay hall, ipahimo o ipatukod na lamang kini og irigasyon, kalsada ug mga lawak-tunghaan.
Apan giangkon usab sa Presidente nga dili kini sayon himuon tungod kay naandan naman apan angay sugdan na ang pagpatul-id sa sistema.
Gitumbok ni PNoy nga mas maayo nga hatagan og pagtagad ang mga proyektong manganak og benepisyo sama sa edukasyon ug panginabuhian. (ecb/PIA7-Bohol)
