Ehersisyo sa mga senior citizens,
gitambag sa DoH
MANILA, Oct. 09 (PIA)–Gitambagan sa Department of Health (DoH) ang mga senior citizens nga siguradohong aduna sila’y regular nga ehersisyo aron masiguro nga naa sila sa maayong panglawas.
Kini agig pag-obserba sa nasud sa Elderly Filipino Week. Ang unang semana sa Oktubre gigahin alang sa mga senior citizens sa nasud base sa Presidential Proclamation No. 470, s. 1994.
Ning bag-o lang, gilusad sa DoH ang usa ka “dancercise” nga may temang “Walk for Life: Ang Nakatatanda ay Yaman, Katuwang sa Pag-unlad ng Bayan, Pangalagaan Kanilang Kapakanan.”
Tuyo sa maong programa nga himuong health conscious ang mga tigulang.
Matud pa ni DoH Assistant Secretary Dr. Eric Tayag, daghang senior citizens ang kuntento na lamang nga kanunay naa sa sulod sa ilang balay, apan giingong angay kanunay pa gihapon silang aktibo aron magbaton og maayong panglawas.
Giingong ang pag-apil sa mga exercise routine o bisan ang paglakaw-lakaw o simpleng ehersisyo sama sa pagsayaw makatabang aron makalikay sa sakit.
Bisan pa man kun adunay mga gipamating sakit sama sa diabetes o taas nga cholesterol ug uban pa, adunay mga ehersisyo nga mahimong himuon.
Giingong mas maayong mokonsulta una sa ilang mga doktor aron mahibaw-an kun unsa ang mga klase sa exercise ang sibo alang kanila.
Gawas sa pagbaton og regular nga ehersisyo, angay usab nga magbinantayon ang mga tigulang sa ilang pagkaon ug siguradohong masustansya ang mga pagkaon niini.
Mas maayo usab nga likayan na ang mga bisyo sama sa pag-inom og mga ilimnong makahubog ug ang pagpanigarilyo. (ecb/PIA7-Bohol)
