Iro sa Coast Guard, gipasidunggan ni PNoy
MANILA, Oct. 17 (PIA)–Usa ka K-9 nga iro sa Philippine Coast Guard (PCG) ang gipasidunggan ni Presidente Benigno ‘Noynoy’ Aquino III sa gipahigayong ika-113th nga anibersaryo sa maong buhatan niadtong Oktubre 16 tungod sa nahimong tabang niini sa pag-recover sa mga patay’ng lawas sa Bohol sa dihang gitay-og ang lalawigan sa 7.2 magnitude nga linog sa niaging tuig.
Apil sa gipasidunggan ni PNoy si Bosh, usa ka Labrador nga iro tungod sa nahimong tabang niini sa pagka-ugkat sa 4 ka patay’ng lawas sa Bohol.
Gipasalamatan sa Presidente ang PCG tungod sa pagpanalipod niini sa teritoryo sa Pilipinas ug pagbantay sa atong kabaybayonan ilabi na sa West Philippine Sea.
Giseguro ni PNoy sa iyang mensahe atol sa anibersaryo sa PCG ang padayon nga pagsuporta sa gobyerno alang sa modernisasyon sa Coast Guard.
Gipasalamatan usab ni PCG Commandant Vice Admiral Rodolfo Isorena si Presidente Aquino tungod sa makasaysayanong suporta niini sa ilang buhatan.
Nagbaton ang PCG ug dugang 300 aluminum boats, 40 rubber boats, 36 staff vehicles ug 46 lighthouses sukad gipatuman ang modernisasyon niini ubos sa administrasyong Aquino.
Isip parte sa modernisasyon sa PCG, nahisgotan ni PNoy ang gidusong maritime capability improvement project diin gikan sa usa ka loan agreement, sunod-sunod nga moabot sugod Oktubre 2015 hangtud 2017 ang 10 ka multi-role responsive vessel gikan sa Japan.
Gitakda usab nga mopalit og 2 ka chopper alang sa PCG sa 2015, dugangan ang gidaghanon sa mga light house ug paghimong operational sa National Coast Watch Center.
Gikalipay usab ni PNoy ang gihimong pakiglambigit sa PCG sa ubang ahensiya sa gobyerno sama sa Bureau of Fisheries aron masiguro nga walay makalusot nga mahimong madgala nasad unya og dugang tensiyon sa West Philippine Sea. (ecb/PIA7-Bohol)
