DOLE: may nagpaabot nga job opportunities sa mga OFWs
nga mamaule gikan sa mga nasud nga apektado sa Ebola
MANILA, Oct. 16 (PIA)–Giseguro sa Department of Labor and Employment (DOLE) nga may nagpaabot nga trabaho alang sa mga overseas Filipino workers nga mamaule gikan sa West Africa tungod sa padayon nga hulga sa Ebola virus.
Matud pa ni kalihim Rosalinda Baldoz, may giandam nang job opportunities ang ilang buhatan alang sa naa sa duha ka libong OFWs nga mamaule gikan sa West Africa.
Gipasabot sa kalihim nga gimanduan na ang Philippine Ovearseas Employment Administration (POEA) sa pagtino sa uban pang mga nasud nga mahimong trabahuan sa mga OFWs.
Kadaghanan sa mga Pilipino sa Liberia, Guinea ug Sierra Leone mga inhenyero ug mga propesyonal nga nagtrabaho sa mga construction industry.
Gawas niini, may trabaho usab dinhi sa nasud ang mahimong ihatag sa mga maapektuhang OFWs. (ecb/PIA7-Bohol)
