MANILA, Jan. 12 (PIA)–Panaghiusa ang sentro sa mensahe ni Presidente Benigno ‘Noynoy’ Aquino III sa New Year Vin d’Honneur (wine of honor) sa Malakanyang karong adlawa.
Gitumbok ni PNoy ang kamahinungdanon sa panaghiusa aron masulbad ang nagkalain-laing problema sama sa kalamidad, sakit ug terorismo.
Atubangan sa ubang opisyal sa gobyerno, mga tinugyanan sa nagkalain-laing nasud ug pipila pa ka bisita, nagpasalamat si PNoy sa pagtabang sa international community sa mga biktima sa Bagyong Yolanda ug Hagupit sa Pilipinas.
Matud pa ni PNoy, napamatud-an ang kamahinungdanon sa paglihok isip usa ka komunidad ang nahitabo sa Ukraine tension, global climate change, dili stable nga oil price, world market, hulga sa pandemic nga MERS-Corona virus o Ebola ug ang mga kagubot sa Pakistan, Australia, Canada ug France.
Dugang pa ni PNoy, dili mahimong mopatigbabaw pa ang iyahay nga paglihok o parochial mindset.
Apan kinahanglang moapil ang matag nasud alang sa mas epektibong pagsulbad sa usa ka katalagmang makaapekto usab sa ubang nasud.
“Now, more than ever, the truism of the saying, ‘United we stand, divided we fall,’ comes to the forefront. We are responsible for our world and its future. Whether in combating climate change and its effects, or in fighting inequality, or in taking a stand against terrorism and instability: the time to act is now,” matud pa ni PNoy.
Sa maong okasyon, nihatag usab og mensahe si Papal Nuncio Giusseppe Pinto sa Vin d’Honneur.
Matud pa niya, gipalig-on sa maong okasyon ang relasyon sa Pilipinas sa international community.
Gidayeg usab niini ang mga reporma sa gobyerno sama sa ekonomiya ug kalinaw, apil na ang paglihok batok sa kalamidad apan gitumbok usab niini nga wala pa kini nahuman tungod kay daghan pang pamilya ang walay gipuy-an. (ecb/PIA7-Bohol)
