MANILA, June 15 (PIA)–Gipaseguro ni Presidente Benigno ‘Noynoy’ Aquino III sa iyang gabinete nga ang mga pondong gigahin kanila magamit gayud kun asa kini angay gamiton.
Kini human gibasura sa Malakanyang ang sugyot ni Sen. Ralph Recto nga gamiton na lamang sa serbisyong panglawas ang mga pondo nga wala nagamit sa gobyerno niining mga niaging panahon.
Giingong maayong kahigayonan kini nga magamit sa gobyerno ang mga wala napalihok nga pondo, atubangan na usab sa nasinating pagkuyanap sa Middle East Respiratory Syndrome Corona Virus (MERS-Cov) diin pipila sa atong mga kababayang Pilipino ang apektado.
Gitumbok ni Presidential Spokesperson Edwin Lacierda nga sa gihimong Cabinet meeting ning bag-o lang, hugot nga gimando ni PNoy sa tanang ahensiya sa gobyerno nga siguradohong magamit gayud sa tukma ug napanahong proyekto alang sa katawhan ang ilang mga budget.
Matud pa ni Lacierda, gipaabot sa Malakanyang nga mas dakung budget ang buhian sa nagkalain-laing ahensiya sa gobyerno alang sa mga public service program sa mosunod nga kwarter ning tuig.
Kahinomduman nga mi-ubos ang economic growth sa nasud sa unang kwarter ning 2015 tungod na usab sa kakulang sa paggasto niini. (ecb/PIA7-Bohol)
