TAGBILARAN CITY, July 28 (PIA)–Gitakdang mopahigayon og ‘Bisita Opisina’ ang mga miyembro sa Association of United Development Information Officers in Bohol (AUDIO-Bohol) sa buhatan sa Technical Education and Skills Development Authority (TESDA) sa ilang training center sa lungsod sa Jagna karong Huwebes, Hulyo 30.
Ang AUDIO-Bohol, usa ka hugpong sa mga information officers kun tigpamaba sa mga kalungsoran ug nasudnong ahensiya sa kagamhanan nga nia sa lalawigan sa Bohol.
Usa sa kalihokan sa AUDIO-Bohol ang ‘Bisita Opisina’ diin mobisita ang grupo sa mga buhatan sa ahensiya sa gobyerno ug mga munisipyo sa kalungsoran aron sa pagpahigayon og diskusyon ug pagpasabot sa ilang mga programa aron matabangan sa grupo sa pagpakatap niini.
Sa alas 9 sa buntag sa Hulyo 30, si AUDIO-Bohol President, Augustus ‘Totsie’ Escobia gitakdang mohatag sa iyang welcome message ug statement of purpose didto sa TESDA-Jagna Training Center.
Human niini, ipahigayon ang Training on Basic Broadcasting Program Structure sa mga information officers nga ihatag ni PIA-Bohol Manager, Rey Anthony Chiu.
Sa may alas 10 hangtud alas 11 sa buntag, mahatagan og kahigayonan ang mga information officers nga magamit ang ilang nakan-onan sa maong training sa pagbalhin sa grupo sa duol nga estasyon sa radyo sa DyPJ alang sa usa ka taping sa Kapihan sa PIA with TESDA nga pagadumalaon nilang PIA-Bohol Manager Chiu ug DyPJ Station Manager, Mr. Catalino Berro.
Ang mga opisyal sa TESDA-Bohol pinangunahahn sa ilang Provincial Manager, Dr. Francisca Opog motuki atol sa Kapihan sa nga programa ug serbisyo sa ilang buhatan.
Human sa Kapihan, ang grupo mobalik ngadto sa TESDA-Jagna Training Center aron ipadayon ang diskusyon sa mga nagpadayong programa ug serbisyo sa TESDA.
Ang TESDA-Bohol gitakdang mopahigayon sa 2nd round sa tinuig nilang implementasyon sa libreng competency assessment ubos sa National TVET Competency Assessment and Certification Programs (NATCAC) sa Agosto 1-31, 2015.
Ang libreng competency assessment karong tuig ipahigayon sa 3 ka schedules sa bulan sa Mayo, Agosto ug Nobyembre 2015.
Sa may ala 1 sa pales, pangunahan ni TESDA Info Officer, Jaminel Damolo ang office tour ug orientation sa Citizen’s Charter sa ilang buhatan. Human niini, ipahigayon ang information sharing sa mga miyembro sa AUDIO-Bohol. (ecb/PIA7-Bohol)
