MANILA, July 28 (PIA)–Gigamit ni Presidente Benigno ‘Noynoy’ Aquino III niadtong Lunes sa iyang katapusang State of the Nation Address (SONA) aron ipahayag ang suporta niya nga magbaton og Anti-Dynasty law ug subling nanawagan nga aprubahan na sa Kongreso ang kontrobersiyal nga Bangsamoro Basic Law (BBL).
Sa iyang mensahe, miingon si PNoy nga “Bakit nga naman tayo gagawa ng batas para pigilan maglingkod ang gustong maglingkod? Pero napapaisip po ako, may mali din sa pagbibigay ng pagkakataon na habang buhay na magpakasasa sa kapangyarihan ang isang tiwaling pamilya o indibidwal.”
Gi-dugang pa sa Presidente nga wala kita makasiguro kun limpyo ang intensyon sa mga kandidato o kun gusto lang nila nga hangtud sa tibuok nilang kinabuhi nga mag-hari alang sa kaugalingon lamang nilang interes, mao nga panahon na aron ipalabang ang anti-dynasty law.
Walay gitumbok nga partikular nga pamilyang politiko si PNoy sa iyang paghatag sa maong mensahe.
Samtang subling gihangyo ni PNoy sa Kongreso nga ipalabang ang Bangsamoro Basic Law nga parte sa hisgotang kalinaw sa Moro Islamic Liberation Front, ug pagmugna sa bag-ong political entity sa Mindanao nga ihulip sa Autonomous Region for Muslim Mindanao (ARMM).
Naundang ang pagtuki sa Kongreso sa BBL tungod sa dugo-ong engkuwentro sa Mamasapono, Maguindanao niadtong Enero nga gilambigitan sa mga operatiba sa Special Action Force sa Philippine National Police, ug MILF fighter ug mga armadong grupo.
Nihangyo usab ang Presidente sa mga supak sa BBL sa paghatag og alternatibong ihulip ug solusyon niini. (ecb/PIA7-Bohol)
