BOHOL, Jan. 27 (PIA)–Gikan sa unang gitakdang petsa nga Pebrero 1, gi-irog na usab sa Commission on Elections (COMELEC) sa Pebrero 8 ang pag-imprenta sa mga balotang gamiton sa piniliay sa Mayo 9.
Matud pa ni COMELEC Commissioner Christian Robert Lim, mao na kini ang pinaka-pinal ug katapusang pag-oktaba sa pag-imprenta ug kun may mo-apelar pang i-irog kini, giingong angay andam silang i-oktaba na usab ang mismong petsa sa eleksyon.
Ang unang petsang target sa COMELEC alang sa pag-imprenta sa balota gitakda niadtong Enero 26, apan gi-irog kini sa en banc sa Pebrero 1 tungod kay kinahanglan pang isa-pinal ang listahan sa mga kandidato.
Matud pa usab ni COMELEC Chair Andres Bautista, ang desisyon sa pagpa-irog sa petsa bunga sa nahimong diskusyon ug gi-konsiderar usab nila ang pipila pa ka mga nag-ungot nga kaso batok sa ubang mga kandidato.
Gipasabot ni Lim nga sa Peb. 1 na unta nila ipagawas ang pinal nga listahan, apan mibotar ang en banc nga i-irog na lang kini sa Peb. 8.
Kini usab, matud pa isip pagtubag sa panawagan sa pipila aron dili sila mapasanginlang mi-bulilyaso sa kandidatura sa pila ka partikular nga politiko o kaha mi-pabor sa uban.
Kahinumdoman nga naa sa deliberasyon pa sa Korte Suprema ang disqualification cases batok kang presidential candidate Sen. Grace Poe, samtang nag-ungot pa sa COMELEC ang mga kasong diskwalipikasyon usab batok sa usa pa ka kandidato sa pagka-presidente nga si Mayor Rodrigo Duterte.
Gitataw ni Bautista nga bisan unsa man ang mahimong desisyon sa maong mga kaso, magpabilin ang ilang desisyon.
Apan gi-angkon ni Bautista ug Lim nga nanghinaot sila nga sayong maresolba ang mga kaso batok kang Poe aron makatabang sa ilang pagsa-pinal sa listahan sa mga kandidato. (ecb/PIA7-Bohol)
