MANILA, Mar. 03 (PIA)–Sugod na karong adlawa ang pagpatuman sa Graphic Health Warning Law ug obligado na ang mga kompaniya sa sigarilyo nga magbutang og mga larawan nga magpakita sa hulga sa panglawas sa pagpanigarilyo sa ilang mga produkto.
Matud pa ni Department of Health (DOH) Kalihim Janette Garin, ubos sa balaod, angay adunay printed nga napulog-duha ka graphic health warning ang mga kompaniya sa sigarilyo.
Ang larawan nga magpakita og mga sakit nga mahimong makuha tungod sa pagpanigarilyo angay ibutang sa mga pakete sa sigarilyo.
Samtang tugtan sa DOH ang mga tobacco companies nga hutdon ang mga daang supply sa sigarilyo nga wala pay graphic health warnings, apan sa tanang bag-ong suplay, angay may mga larawan na.
Sa pagsugod sa implementasyon sa maong balaod, magbaton ang DOH og assessment aron matumbok kun unsa kadaku ang mahimong epekto sa mga nanigarilyo o kun makuhaan ba ang gidaghanon sa mga tigpanigarilyo tungod sa pagbutang og graphic health warnings. (ecb/PIA7-Bohol)
