MANILA, Mar. 07 (PIA)–Ang nasodnong kagamhanan mi-ila sa papel sa kababayen-an ug sa ilang kontribusyon ngadto sa katilingban duyog sa pag-apil sa nasod sa tibuok kalibotan sa kasaulogan sa International Women’s Month ug International Women’s Day.
Ang United Nations misugod sa pagsaulog sa International Women’s Day niadtong Marso 8, 1975.
Sa Pilipinas, gideklarar ang buwan sa Marso isip Women’s Month ubos sa Akta Republika 6949.
Matud pa ni Presidential Communications Operations Office (PCOO) Kalihim Herminio “Sonny” Coloma Jr., nakighiusa ang gobyerno sa tibuok kalibotan sa mahinungdanong papel ug kontribusyon sa kababayen-an sa atong katilingban, dili lamang isip kahayag sa atong panimalay, apan isip usa ka lig-ong haligi sa padayon nga paglambo sa atong ekonomiya sa atong pagsaulog sa kalibotanong Adlaw sa Kababayen-an ugma, Martes, Marso 8.
Si Coloma nagkanayon nga ang Philippine Commission on Women ang manguna sa kasaulogan nga nagdala sa tema nga “Kapakanan ni Juana, Isama sa Agenda”.
“Sa nakalipas na limang taon, isa sa mga mahalagang haligi ng programa sa kagalingang panlipunan ng pamahalaan ang pagtataguyod ng pagkakapantay ng kasarian o gender equality batay sa prinsipyong nakapaloob sa Republic Act 9710, enacted in 2008, o ang Magna Carta of Women,” matud pa ni Coloma.
Gitataw usab sa Kalihim ang ranking sa nasod sa 2015 Global Gender Gap Report of the World Economic Forum niadtong Nobyembre.
Sa gipagawas nga 2015 Global Gender Gap Report sa World Economic Forum niadtong Nobyembre, naa sa ika-7 nga pwesto ang Pilipinas ug nag-inusayang nasod gikan sa Asya, gikan sa kinatibuk-ang 145 ka nasod sa tibuok kalibotan, pag-abot sa gender equality ug paghatag og oportunidad sa mga kababayen-an sa upat ka aspeto: economic participation, educational attainment, health and survival ug political empowerment. (ecb/PIA7-Bohol)
