TAGBILARAN CITY, March 28, (PIA)— Mikabat sa 38,801 ka bubong sa kabalayan gikan sa 8 ka kalungsuran sa Bohol nga biktima sa linug ang nakadawat sa hinabang alang sa housing materials gikan sa National Housing Authority (NHA).
Kinatibuk-ang P388 milyones ang nagasto sa kagamhanan pinaagi sa NHA alng niini, ug aron sa pag-abag sa mga Bol-anon nga makabarug human sa katalagman, segun pa sa NHA.
Subay sa taho sa NHA Visayas Management Office nga nabase sa Sugbo, nakadawat ang mga benepisaryo sa kalungsuran sa Maribojoc, Antequera, Carmen, Tubigon, San Isidro, Catigbian, Loon, Sagbayan ug Calape sa kinatibuk-ang tag P10, 000 nga bili abag alang sa housing materials.
Matud sa NHA, ang tananag hinabang nadawat na ug nadapat na sukad pa niadtong 2014, segun sa taho ni Engr. Carolyn Mae Maceda, NHA senior engineer.
Sa walo ka lungsod, ang Loon ang may labing daghang gitabangan sa NHA diin mikabat sa 8,190 ka banapisaryo sa tag P10,000.00, matud ni Gavino Fuguracion, NHA Regional Manager.
Sa Tubigon, 7,183 ka banapisaryo ang midawat sa tag P10,000.00 alang sa materyales, samtang sa Catigbian, 4,241 ka house beneficiaries sa NHA ang natala.
Sunod na usab ang Sagbayan, diin ang sentro sa linug miguba sa panimalay sa 4, 130 ka banapisaryo sa NHA.
Sa laing bahin, sa Calape, 3,833 ka bubong ang natabangan sa tag P10 mil samtang sa Maribojoc, 3,347 ka households ang nakadawat sa tabang sa kagamhanan.
Sa Antequera, 3,178 ka households ang natabangan sa NHA ug sa Carmen, 2, 820 ka bubong ang may tag P10,000 alang sa housing materials gikan sa NHA. (rac/PIA-7/Bohol)
