BOHOL, Mar. 31 (PIA)–Gitataw ni Department of Social Welfare and Development (DSWD) Kalihim Corazon ‘Dinky’ Soliman nga gawasnon ang mga benipesaryo sa Pantawid Pamilyang Pilipino Program (4Ps) nga ibotar ang gusto nilang kandidato sa piniliay sa Mayo 9, 2016.
Dungan niini ang pagtin-aw ni Soliman nga walay katungod o gahom ang mga opisyal sa barangay nga tangtangon sa listahan ang mga benepisaryo sa programa.
Nakaabot ang kasayoran sa Kalihim nga may mga opisyal sa barangay ang nanghulga sa mga benepisaryo nga tangtangon sila sa listahan kun dili ibotar ang mga gi-indorsong mga kandidato.
Dugang pa sa kalihim nga kini ang hinungdan mao nga gipatambong nila ang mga benepisaryo sa Family Development Sessions ilabi na karong panahon sa eleksyon aron masayod sila sa ilang mga katungod.
Gitataw ni Soliman nga ang pagpabilin sa listahan sa mga benepisaryo nag-agad sa pagsunod nila sa mga kondisyon sa programa ug dili sa desisyon sa bisan kinsang lokal nga opisyal.
Gitakdang mobisita na usab dinhi sa lalawigan si Soliman sa Lunes, Abril 4 aron ilusad ang ilang kampanyang “Tuloy Ang Pagbabago.”
Ang “Tuloy Ang Pagbabago” usa ka communication campaign nga nagtinguha sa pagpanalipod ug pagpausbaw sa kaamgohan sa katungod ug obligasyon sa mga benepisyaryo, ilabi na sa nagsingabot nga nasudnong piniliay.
Pinaagi sa maong kampanya, ang mga partner-beneficiaries gipaabot nga mahimong mas maigmaton ug maalamon ilabi na sa ilang katungod isip lungsoranon nga niangkorahe sa Active Citizenship Module sa Family Development Session.
Ang maong kampanya, nagtinguha usab sa pagdasig sa mga benepisyaryo nga mahimong aktibo sa pagsalmot sa eleksiyon, paghatag kanila og kapasidad sa pagpadayag ug pagbarug sa ilang mga katungod. (ecb/PIA7-Bohol)
