MANILA, April 29 (PIA)–Gipahibalo na sa Department of Budget Management (DBM) nga makadawat na ang mga kawani ug opisyal sa gobyerno sa ilang midyear bonus o 14th month pay karong Mayo.
Matud pa ni DBM Kalihim Butch Abad nga base sa Executive Order No. 201 nga gilagdaan ni Presidente Benigno ‘Noynoy’ Aquino III niadtong Pebrero, makadawat og 14th month pay ang mga kawani sa gobyerno nga kapareho sa usa ka buwan nga basic salary.
Nakalatid sa EO 201 ang umento sa suholan sa mga sibilyang empleyado, apil na ang bag-o ug nadugang nga allowance alang sa mga militar ug uniformed personnel.
Madawat kini pareho sa mga sibilyang empleyado ug mga militar sugod Mayo 15.
Samtang mao gihapon ang yearend bonus nga nagkantidad og usa ka buwan nga sweldo nga may kauban pang cash gift nga P5,000 nga madawat usab sugod Nobyembre 15.
Samatang walay labot niini ang mga empleyado sa government owned and/or controlled corporations tungod kay may lahi man sila nga Compensation and Position Classification System (CPCS).
Matud pa sa DBM nga tuyo sa maong executive order nga ipareha ang kompensasyon nga gitanyag sa mga pribadong kumpanya aron ma-aghat ug magpabilin ang mga civil servants sa gobyerno. (ecb/PIA7-Bohol)
