MANILA, May 6 (PIA)–Gipahibalo na sa Department of Education (DepEd) nga sa Hunyo 13, 2016 na magbukas ang klase sa tanang mga pampublikong tunghaan alang sa school year 2016-2017.
Base sa school calendar nga nahisulod sa DepEd Order 23 series of 2016, kinatibuk-ang 202 ang school days o adlaw sa klase sa mga tinun-an, apil na ang lima ka adlaw nga in-service training o INSET break.
Ang school year gilangkoban sa 54 ka adlaw alang sa unang kuwarter; 48 adlaw sa ikaduhang kuwarter; 48 adlaw sa ikatulong kuwarter ug 52 adlaw sa katapusang kuwarter, samtang matapos ang school year sa Abril 7, 2017.
Gipahinumdom ni DepEd Kalihim Armin Luistro sa mga pribadong eskwelahan nga ang pagbukas sa klase nila dili mosayo sa unang Lunes sa Hunyo ug dili molapas sa katapusang adlaw sa Agosto.
Sa maong school year usab sugdan ang full implementation sa K to 12 program sa tibuok Pilipinas, partikular sa Senior High School.
Base sa datos sa DepEd, naa sa 5,927 public schools ang magsugod og tanyag og Grade 11 sa 2016 ug Grade 12 sa 2017; samtang 4,827 private high schools, private ug public universities and colleges, ug technical-vocational schools ang nagtanyag na og Grade 11 sa 2016 ug Grade 12 sa 2017.
Kining mga pampublikong tunghaan mogamit na sa mga bag-ong lawak-tunghaan ug pasilidad. (ecb/PIA7-Bohol)
