MANILA, May 16 (PIA)–Sugod karong adlawa, i-release na ang naa sa P31 bilyong mid-year bonus sa mga empleyado sa gobyerno.
Matud pa sa Department of Budget and Management (DBM), na-release na nila sa nagkalain-laing ahensya sa gobyerno ang special allotment release order (SARO) alang sa bonus sa mga government employees.
Ubos sa Executive Order No. 201, ipahatag ni Presidente Benigno ‘Noynoy’ Aquino III ang mid-year bonus nga nagkantidad og usa ka buwan nga sweldo sa tanang civilian ug uniformed personnel sa gobyerno.
Makadawat og mid-year bonus ang mga empleyado nga naa sa serbisyo sulod sa upat ka buwan o labaw pa sugod niadtong Hulyo 2015 hangtud Mayo 15, 2016.
Apan pahinumdom sa DBM, tanang ahensiya sa gobyerno kinahanglang magpahigayon og performance evaluation sa ilang mga empleyado ikaduha sa usa ka tuig. (ecb/PIA7-Bohol)
