TAGBILARAN CITY, May 17 (PIA)–Subling nipahinumdom si President-elect Rodrigo Duterte sa mga empleyado sa gobyerno nga kinahanglang dili lisod-lisoron ug e-tratar og maayo ang mga mokuha og mga dokumento o permit gikan sa mga ahensiya sa gobyerno.
Matud pa ni Duterte, mas maayong mohawa na lamang sa trabaho ang bisan kinsang maglisod-lisod sa katawhan sa pagkuha og permit ug mga dokumento gikan sa mga lokal nga kagamhanan hangtud sa Palasyo sa Malakanyang.
Si Duterte nagkanayon nga dali lamang alisdan ang mga empleyado nga tig-abusar sa ilang trabaho.
Miingon usab siya nga kun may madawat siyang reklamo gikan sa katawhan, mahimong paimbestigahan niya kini sa Ombudsman, ipasuspenso o di kaha pahawaon sa trabaho.
Gitataw ni Dutrte nga kinahanglang magtrabaho og maayo ang mga naa sa gobyerno ilabi na nga gikan sa buhis sa katawhan naggikan ang mga sweldo niini.
Samtang ang tanang aplikante sa gobyerno usab, mapa-departamento man o korporasyon nga gimando sa gobyerno apil na ang mga polis ug militar giingong dili angay magsalig sa palakasan tungod kay turn-off niining sistema ang umaabot nga bag-ong Presidente.
Alang usab sa promosyon, giingong wala na’y uban pang basehan kun di ang merito ug kamaayo sa pagserbisyo.
Karon, kun tinuod nga may pagmahal sa katawhan ug tinuod nga pagserbisyo, adunay lugar ang mga ingon niining aplikante ubos sa administrasyong Duterte. (ecb/PIA7-Bohol)
