MANILA, May 17 (PIA)–Libre na ang pagpa-rehistro og negosyo sa mga Barangay Micro-Business Enterprises (BMBEs) sa Department of Trade and Industry (DTI) pinaagi sa ilang mga Negosyo Centers.
Tungod niini, gi-awhag ni DTI Regional Operations Group Supervising Undersecretary Zenaida Maglaya ang mga micro enterprise sa pagpa-rehistro sa ilang mga negosyo ug pahimoslan kining insentibo ubos sa balaod sa BMBE.
Matud pa ni Maglaya nga ang rehistradong BMBEs makapahimos sa insentibo sa gobyerno nga naglakip sa exemption sa pagbayad og income tax alang sa kinitaan gikan sa operasyon sa patigayon, exemption gikan sa coverage sa minimum wage law, special credit window sa mga government financing institutions nga moserbisyo sa panginahanglan sa BMBEs, apil na usab ang technology ug marketing assistance.
Ubos sa Akta Republika 9178 o ang BMBE Act of 2002, ang BMBE mao ang bisan unsang business entity o patigayon nga nalambigit sa produksyon, pag-proseso o pagbuhat og produkto o epektos, apil na ang agro-processing, trading ug serbisyo kansang kinatibuk-ang kabtangan, dili apil ang yuta, dili mokabat sa P3 milyon. Ang maong kabtangan maglakip sa nakuha gikan sa utang, apan dili apil ang yuta diin nahimutang ang planta ug ekipos.
Ang DTI mipagawas sa Department Administrative Order (DAO) No. 16-01 niadtong Abril 22, 2016 diin gihatag ang mga sumbanan sa pagpa-rehistro sa BMBEs sa mga Negosyo Centers.
Ubos sa DAO 16-01, ang DTI ang bugtong ahensya nga mo-isyu og Certificate of Authority (CA) ngadto sa rehistradong BMBEs sa mga Negosyo Centers o sa mga buhatan sa DTI nga wala pay mga Negosyo Centers nga natukod.
Sa dili pa ang pag-isyu sa DAO, ang BMBEs kinahanglang moparehistro sa Office of the Treasurer sa syudad o munisipalidad diin nahimutang ang ilang negosyo.
Ang Akta Republika 9178 o BMBE Act of 2002, mi-ila sa papel sa BMBEs isip essential driving force sa pag-usbaw sa ekonomiya sa nasod. (ecb/PIA7-Bohol)
