MANILA, May 31 (PIA)–Tungod sa pagsulod sa panahon sa ting-ulan nga natunong sa nagsingabot usab nga pagbukas sa mga klase alang sa School Year 2016-2017, nipasidaan ang Department of Health (DOH) sa publiko, ilabi na sa mga estudyante batok sa nagkalain-laing sakit nga makuha sa panahon sa ting-ulan
Matud pa ni DOH Kalihim Janette Garin, kinahanglang mag-amping sa mga water-borne ug vector-borne diseases.
Pipila niini ang dengue, chikungunya ug malaria.
Mag-amping usab sa ubo, sip-on, ug hilanat nga maoy uso kun ting-ulan.
Gipahinumdoman pa sa kalihim ang mga ginikanan nga pakusgan ang resistensya sa mga bata pinaagi sa paghatag og saktong nutrisyon ug regular nga pag-ehersisyo.
Giingong angay usab nga siguradohon ang igo ug saktong oras sa pagtulog sa mga bata aron makalikay sa mga sakit.
Dugang pa ni Garin, makatabang ang pagbukas og bintana aron dili makagawas ang infectious diseases sa balay aron malikayan nga makatakod sa ubang tawo.
Samtang, gipa-amping usab batok sa pneumonia ang mga senior citizens.
Gipahibalo sa kalihim nga may bag-ong programa nga bakuna batok sa pulmonya ang DOH alang sa mga senior citizens.
Giingong dili na kini alang lamang sa pipila tungod kay tanang motungtong sa edad 60 anyos, mahimong magpa-bakuna og libre sa mga rural health unit o City Health Office, basta i-prisentar lamang ang ilang senior citizen ID. (ecb/PIA7-Bohol)
