TAGBILARAN CITY, June 2 (PIA)–Nipasidaan ang pamunoan sa Food and Drug Administration (FDA) sa publiko batok sa pekeng tambal sa sakit nga Hepatitis C nga mikuyanap karon sa Southeast Asia.
Nipagawas og pasidaan ang FDA human sa gipagawas nga advisory sa World Health Organization (WHO) batok sa pagkuyanap sa mga pekeng tambal sa rehiyon.
Gitumbok sa FDA ang pekeng tambal nga Sofosbuvir+Ledipasvir (Ledso) 400 mg/90 mg capsule ug Daclatasvir (Dakavir) 60 mg capsule nga may label sa Pharco Corporation, nga nakabase sa Alexandria, Egypt.
Apan gihimakak sa maong medicine company nga wala sila’y ingon niining matang sa tambal.
Nipasidaan ang FDA batok sa bisan kinsang masakpan nga nagkopot o namaligya niniing pekeng tambal nga pasakaan og kaso sa paglapas sa Republic Act No. 9711 o FDA Act of 2009.
“The presence of these identified products pose potential danger or injury to the consuming public and the importation, selling or offering for sale of such is in direct violation of Republic Act No. 9711 or the Food and Drug Administration Act of 2009,” matud pa sa ahensiya.
Ang FDA nag-deploy na karon sa ilang mga opisyal sa Field Regulatory Operations Office aron mosusi sa mga drug stores ug mga susamang establisemento. (ecb/PIA7-Bohol)
