TAGBILARAN CITY, June 6 (PIA)–Gi-uswag sa Galing Purok Awards Committee taman Hunyo 10, 2016 gikan sa unang gitakdsang petsa nga Mayo 30, 2016 ang pagsumiter sa nominasyon alang sa Galing Purok Awards (GPAs) sa lalawigan sa Bohol.
Kini aron mas mahatagan pa og igong panahon nga maduso sa mga kabarangayan ang ilang mga gikarekomendar nga purok aron matimbang sa mga Municipal Evaluation teams sa dili pa ibangga ang mga mananaug sa provincial level ug gantihan ang makadaug.
Ang Galing Purok Awards sa Bohol, napalig-on pinaagi sa Provincial Ordinance No. 2011-36, diin gipahimutang niini ang Purok Power Movement (PPM) isip nag-unang stratehiya sa pagpatuman sa mga sistema nga sundon sa mga purok aron sa mas sayong nga pagpadagayday sa mga programa sa kagamhanan.
Gipatuman pinaagi sa diwa sa tinabangay ug alayonay, ang PPM g-ubanan sa Department of Interior and Local Government (DILG), Department of Agrarian Reform (DAR), Department of Environment and Natural Resources (DENR), Department of Agriculture (DA), Department of Labor and Employment (DOLE), National Irrigation Administration (NIA), Philippine National Police (PNP), Philippine Army ug uban pang mga civil society nga kahugpungan.
Gawas sa Best Purok Award nga sumada sa mga awards nga gibugtaw, laing 24 ka grupo ug indibidwal lakip na ang program awards ang ilogan sa libo-an ka purok sa lalawigan sa Bohol. (ecb/PIA7-Bohol)
