TAGBILARAN CITY, June 14 (PIA)–Ang pamilya Garay gikan sa Barangay Can-upao sa lungsod sa Jagna ning lalawigan sa Bohol ang napiling mananaog sa 2016 Huwarang Pantawid Pamilya Bohol Provincial Search diin labaw sa 40 ka entries ang ilang gikabangga.
Si Vicente ug iyang asawa nga si Marissa wala nagdahom nga modaog tungod kay matud pa nila, ila lamang gipa-ambit ang estorya sa ilang pamilya.
Ang magtiayon may pito ka mga anak diin tulo niini ang benepisyaryo sa Pantawid Pamilyang Pilipino Program ug kini sila mao si Aria Venice, Lee Mark ug Vic Jun.
Ang ilang kinamagulangan nga si Ivy usa ka electrical engineering graduating student, si Rose Marie ang ikaduha naa na karon sa 3rd year college nga nikuha sa kursong Bachelor of Education, si Prince naa sa day care ug ang kinamanghoran nga si Vincent Ian duha ka bulan pa lamang.
Ang Pantawid Pamilya usa ka conditional cash transfer sa gobyerno nga namuhonan sa edukasyon ug panglawas sa mga kabos nga banay nga may anak nga may edad 0-18. Gi-implementar kini ubos sa Department of Social Welfare and Development (DSWD).
Agi og pag-ila sa ilang modelong partner-beneficiary, ang DSWD nangita matag-tuig og Huwarang Pantawid Pamilya nga awtomatikong maapil sa ilang ‘pool of family ambassadors’ sa maong programa.
Ang maong pagpangita mo-ila sa mga pamilyang nagpakita og maayo ug lig-on nga relasyon, positibo nga Pilipinhong pamatasan ug may positibong impak sa komunidad diin sila namuyo.
Ang ubang mananaog sa probinsiya mao ang pamilya Alingasa sa Barangay La Libertad Sur, Catigbian (2nd place) ug pamilya Manginsay sa Barangay Hunan, Buenavista (3rd place).
Ang nag-unang provincial winners awtomatikong mobangga alang sa regional search ug ang regional winner maoy opisyal nga ipadala sa DSWD-7 ngadto sa national search.
Ang awarding ceremony sa regional search ipahigayon sa Hulyo 8, 2016 sa syudad sa Sugbo. (ecb/PIA7-Bohol)
