SUKWAHI sa pahayag ni Sen. Aqulino Pimentel, dili ilegal ang paghatag sa P500 nga subsidy alang sa koryente, kini pamahayag ni Budget Secretary Rolando Andaya Jr.
Matud niya, mahimo sa kagamhaan nga gamiton ang P114-billion nga wala ma program nga pundo sa 2008 General Appropriations Act (GAA) kay kini may “standby appropriation” nga may “natigum nga pundo alang sa natumbok nga katuyuan”.
Una na nga gipahayag ni opposition Sen. Aquilino Pimentel nga ang P500 power subsidy, illegal kay wala kini itagana sa Kongreso alang sa maong katuyuan.
Patin-aw ni Andaya, ang pundo mahimo nga a-buhian kon ang revenues mosobra sa gibanabana nga makobra nga buhisan subay sa Budget of Expenditures and Sources of Financing.
Dugang ni Andaya, ang unprogrammed funds lakip na sa budget nga gisubmitir sa Presidente ngadto sa Kongreso ug kini gihimong balaod isip kabahin sa GAA alang sa tuig.
Sa pagtaas sa presyo sa lana, ang value added tax (VAT) niini mitaas usab, hinungdan nga mitaas usab ang mahipos sa kagamhanan niini, padayag niya.
Gisalikway usab niya ang sugyot ga ang Executive mohimo na sa yano nga line item budgeting, diin ang mga tagsatagsa ka financial statements tipoon sa ilang mga departamento na lamang.
Ang giingong nga yano nga budgeting, ni Andaya pa, maoy makaparalisar sa kagamhanan tungod kay dili kini dayon maka-aksyon kon may kinahanglang aksyon, ilabi na kon wala masubay sa budget.
Ang line budgeting nga maoy uso kaniadto, dali nga magpakita sa kalainan sa mga milabay nga budgeting ug accounting periods, ug magpasayon sa basehan sa gastohan sa kasamtangan ug sa umaabot nga mga panahon.
Kini usab magpugong sa mga opisyales sa kagamhanan sa paghulbot ug pundo nga magamit sa emerhensya sama sa nahitabo karon sa krisis sa kalibutan. (rachiu/PIA)
