TAGBILARAN CITY, July 7 (PIA)–Nipagawas na ang Commission on Elections (Comelec) sa timeline o target nga mga petsa kalabot sa pagpa-rehistro sa mga botante alang sa nagsingabot nga Barangay ug Sangguniang Kabataan Elections sa Oktubre 31, 2016.
Sa Resolution No. 10148 nga may petsang Hulyo 5, 2016 ug gilagdaan sa mga miyembro sa Commission En Banc, gitakda ang registration period gikan Hulyo 15 hangtud 30, 2016.
Ang pagpatala kinahanglang personal nga adtuon sa Offices of the Election Officer sa matag lungsod ug munisipalidad, alas 8:00 sa buntag hangtud alas 5:00 sa hapon.
Ang pagpa-rehistro mahimo usab himuon bisan sa adlaw sa Sabado ug Domingo ug bisan adlaw sa pista opisyal.
Kalabot niini, gitakda usab sa Comelec sa Agosto 8 ang katapusang adlaw sa pagsang-at og opposition to application for registration, samtang ang pagdungog, pag-apruba ug pagbasura sa aplikasyon gitakda hangtud Agosto 11.
Alang sa SK elections, ang gitogotan nga makabotar mao ang mga may edad 15 anyos ug dili molapas 30 anyos sa pag-abot sa Oktubre 31; ug kinahanglang residente sa barangay diin siya nagparehistro sulod sa dili mo-ubos sa unom ka buwan. (ecb/PIA7-Bohol)
