MANILA, July 8 (PIA)–Gikumpirmar ni Presidential Communications Office (PCO) Kalihim Martin Andanar nga mahimong fully operational na sa buwan sa Agosto ang Citizen Hotline 8888 ug ang 911 Nationwide Emergency Response Center.
Matud pa ni Andanar, ang 8888 ang magsilbing sumbunganan sa publiko sa mga badlongon nga mga kawani ug opisyal sa gobyerno.
Giingong mahimo usab itawag sa maong numero ang mga wala naaksiyunan nga proyekto sa gobyerno apil na usab ang mga mi-abusar sa ilang mga posisyon.
Samtang ang 911 emergency hotline usab maoy ihulip sa kasamtangang 117 nga mi-ani og pagsaway tungod sa langay nga pagtubag sa mga call center operators.
Matud pa ni Andanar nga nahimong epektibo ang 911 hotline sa syudad sa Davao alang sa paspas nga pagresponde sa mga polis, bumbero ug medical personnel ug giingong kini ang gustong buhaton ni Presidente Rodrigo Duterte sa tibuok nasud.
Una nang misulti si Duterte nga himuong 24-oras ang 8888 hotline nga atimanon sa mga opisyal sa Presidential Action Center (PACE) alang sa mas paspas nga pagtubag sa mga reklamo sa publiko.
Apan nipasidaan ang Presidente nga angay tinuod lamang gayud ang mga i-reklamo sa maong hotline tungod kay manubag kaniya ang bisan kinsang maghimo-himo lamang og estorya aron iduot ang usa ka partikular nga kawani o opisyal sa gobyerno. (ecb/PIA7-Bohol)
