BOHOL, July 18 (PIA)–Nanghawod ang munisipalidad sa Calape sa lalawigan sa Bohol sa competitiveness index diin nakab-ot niini ang unang puwesto sa kategoryang Government Efficiency sa 3rd to 6th class municipalities.
Nag-una ang Calape sa 755 ka uban pang munisipalidad sa tibuok nasod sa ranking sa Cities and Municipalities Competitiveness Index (CMCI) karong tuig nga gihimo sa National Competitiveness Council (NCC).
Samtang nahimutang usab sa ikapitong dapit ang lungsod sa Jagna sa kategoryang Economic Dynamism sa 3rd ngadto sa 6th class municipalities.
Ang dakbayan sa Tagbilaran usab nakab-ot ang ika-25 nga overall ranking alang sa tanang component cities sa tibuok nasod.
Niadtong 2015, nahimutang sa ika-34 nga puwesto sa 110 ka component cities sa tibuok Pilipinas ang syudad sa Tagbilaran.
Ug karong tuig, nisaka pa kini sa siyam ka lakang nga nagbutang sa syudad sa Tagbilaran isip most competitive component city sa tibuok Central Visayas.
Ang NCC ranking nagsukod sa competitiveness sa 1,300 ka local governments sa tibuok nasod base sa tulo ka haligi sa kalamboan nga mao ang Economic Dynamism, Government Efficiency ug Infrastructure.
Ang NCC nihingan sa labing competitive LGUs atol sa 4th Regional Competitiveness Summit niadtong Hulyo 14 nga gipahigayon sa Philippine International Convention Center (PICC) diin gi-ila niini ang krusyal nga papel sa LGUs sa pagdasig sa competitiveness sa nasod.
Ang maong kalihokan nipatugbaw sa resulta sa 2016 CMCI. (ecb/PIA7-Bohol)
