MANILA, July 18 (PIA)–Aron masiguro nga magamit og sakto ug dili masulod sa bulsa ang intelligence fund sa mga local government units (LGUs), usa ka special team ang ipamugna ni Presidente Rodrigo Duterte nga mosusi kun gi-unsa paggasto ang nahisgotang pondo, apil na kun asa naadto ang ilang discretionary funds.
Matud pa ni Duterte, makatabang ang himuong special team aron masubli kun asa naadto ang nahisgotang pondo sa mga gobernador ug mayor.
Giingong pinaagi niini, mahibaw-an kun gipalit lamang sa mga mahalong sakyanan ang ilang pondo o nagamit ba sa ilang nasakupan.
Kining maong lakang sa Presidente gihimo human sa mga nadawat nga pagsaway sa kadaghanan nga hugaw ang Pilipinas tungod kay walay gihimong garbage management ang mga opisyal sa mga lokal nga kagamhanan diin ang discretionary funds mahimong magamit dinhi kun walay tukmang pondo ang lokal nga kagamhanan.
Matud pa ni Duterte nga ang mga non-performing mayor angay nang mohimo og paagi aron magpabiling limpyo ug hapsay ang ilang lugar. (ecb/PIA7-Bohol)
