POSOY ang mga nagdahum nga tugotan gilayon sa Liga sa mga Mayores sa Pilipinas (LMP) ang dinaliang pagsugod sa Small Town Lottery (STL) dinhi.
Atul sa tigum sa mga mayores didto sa Sagbayan peak Miyerkules, nahukman nga I-oktaba una ang pag-endorso sa pagsulod sa STL dinhi, sanglit buot nila nga katun-an pag maayo ang lakang.
Kahinumduman nga gisugyot ni Congressman Adam Relson Jala ang pagpasulod sa STL aron patyon ang illegal nga swertres.
Apan sa nauna nga tigum sa LMP, gbutyag sa usa ka tinugyanan sa Phil. Charity Sweepstakes Office nga segun sa ilang kasinatian, dili pa maseguro nga patyon sa STL ang mga illegal nga sugal.
Giendorso na unta ni Mayor Telesforo Balagosa sa Lila ang STL apan sa boto sa mayoriya, gihukmang Ipadaplin una ang sugyot hangtud ika tigum ang PCSO sa tanang mayors sa ilang lakaw sa Manila sa sunod semana. (rachiu/PIA)
